Апанни Къапиевлул цIанийсса Лакрал музыкалул ва драмалул театрданул тIиртIунни ирглийсса сезон Халкьуннал шаэр Сибирбаг Кьасумовлул пьесалиясса «Оьтту ва макь» тIисса спектакльданийну.
Ва спектакльданул премьералийну ларкьуссия хьхьичIмур сезон. Хъунмасса тIайлабацIулущал кьамул бувна спектакль Гъумук ва Ваччавгу.
Режиссер Дагъусттаннал Халкьуннал артист Аслан МахIаммадов; сценограф – Дагъусттаннал Халкьуннал художник Ибрагьимхалил Супиянов; хореограф — Аьрасатнал лайкь хьусса артист Муса Оздоев; музыкалул композициярттал автор Дагъусттан Республикалул магьирлугърал лайкь хьусса ишккакку Рамазан Фаталиев. Ишла бувну бия Аьрасатнал Халкьуннал артист Ширвани Чаллаевлул музыка.
Спектакльдануву гьурттуну бия Лакрал театрданул щала труппа ва Оьруснал театрданул цаппарасса актертал.
Спектакль хас бувну бур Дагъусттаннал ва Чачаннал агьлу гьурттуну бивкIсса 1877 шинал хьусса Оьруснал паччахIнайн къаршисса бунтираву ливтIу-бивщусса дагъусттаннал ва оьруснал чиваркIуннал аьпалун.
ДакIнийн бутанну, Дагъусттаннал тарихраву кьурчIисса кьадарну хьусса иширттая бусласисса проект чулийн бувкссар Республикалул БакIчинал грантрацIух.
Спектакльдануву ккаккан бувну бур ПаччахIнал хIаписартурал ва кIантту-кIанттурдайсса бакIдургьуминнал буллалисса зулмурду ва рахIму бакъашивуртту духIан къахъанай, Дагъусттаннал халкь паччахIнайн къаршину гьаз хьуну бивкIсса ишру. Ярагъуннил балгусса паччахIнал аьралуннаяр цивппа ххув хьуншиврийн щала вихну къабивкIхьурчагу, бунтираву чялишсса гьурттушинна дурну дур лакрал дакIмяшсса, язисса арантуралгу. Миннавагу кув ттупал ва ттупангирттал кьатI бувну, кув аьс бувну, кувгу махругу дирхьуну Сибирнавун тIайла бувккун бур. Тайннах увкусса зумалул махъру бухьунссар халкьуннал балайлийн кIура бавсса «Вай ци ххитри ххуллийхсса?» тIисса халкьуннал балай. Тамашачитурал оьтту-ттурчIавун зурзу багьанну увкунни театрданул актрисахъал ва балай.
«Жула миллатрал хьхьичIавасса балайрдах вичIидирхьусса чIумал оьттул лицIлацIисса гьухъа хьхьицIлацIисса кунмасса асар бияй,» — учай жула хъунасса композитор Ширвани Чаллаевлул. Циван къабикIави, туну, жула балайрду зумардаха лавхьхьусса, ци-цигу оьсса кьинирду ппухълуннал бакIрачIан дуркIсса чIумал.
Дагъусттаннал Халкьуннал шаэр Фазу Аьлиевал: «Чув ттупанг битарчагу, ккулла ниттихъал къюкIливухри буккайсса» тIисса махъру дакIнийн багьлай бия ца чулуха лакрал ниттихъул «АьтIийннари дусса ниттихъал дакIру» тIисса балай тIий, вамур чулуха оьруснал аьралитурал ниттихъул цалами арсваврах зума тIий бувксса чIумал. Циксса бакъахьунссар чил мурадру щаллу бан зунттавун тIайла бувккун бивкIсса паччахIнал аьралитал, гъурбатрай гьаврду нясив дурсса.
Хьувча ва спектакль ялун нанисса никиран лавгмунил дирхьусса дарсрунугу, ялун бучIантIимунихсса пикринугу.
