Ноябрь зурул 20-нний Москавлив ВДНХ-лул базалий хьунтIиссар цIуллу-сагъшиврул ссуссукьушиву дусса жагьилтурал дянивсса захIматрал пишардал
магьиршиву ккаккан дуллалисса Миллатирттал IV-мур «Абилимпикс» чемпионат. Республикалул чулуха ва чемпионатрай гьурттушинна дантIиссар 9 пишакарнал ва 8 экспертнал.
Имара Саидова
Пишардал усттаршиву ккаккан дуллалисса бяст-ччаллу най бикIантIиссар шанма гьантлул мутталий.
Дагъусттаннаясса командалуву гьуртту хьунтIиссар республикалул ххюва колледжрал студентътал. Бяст-ччаллу хьунтIиссар «Медициналул даврил», «Физкультуралул», «Экономикалул ва бухгалтершиврул хIисав даврил», «Веб-дизайнналул», «Психологиялул», «Программалул дузал баврил», «Таржумачишиврул» ва «Гулавати щащаврил» пишардал усттаршиву ккаккан давриву.
ДакIнийн бутанну, ванияр хьхьичIсса Миллатирттал чемпионатрай Дагъусттаннал командалул хьхьичIунсса хIасиллу хьуну диркIшиву. Дагъусттаннал командалувасса «Психологиялул» пишалул усттаршиву ккаккан дурсса Луиза Зязиковал ва «Таржумачишиврул» пишалул усттаршиву ккаккан дурсса Саида ХIажиевал, кIилчинми кIантту бувгьуну, медаллу ларсшиву.
Дагъусттан «Абилимпикс» чемпионатрай гьурттушинна дуллай байбивхьуссар 2017 шинал. Ларгсса шиналсса «Абилимпикс» чемпионатрай республикалиясса командалул гьурттушинна дурссия шанма журасса пишардал усттаршиву ккаккан давриву.
