«Зунттал халкь» фестивальданул гьурттучитал шагьрулул бакIчиначIа

«Зунттал халкь» фестивальданул гьурттучитал шагьрулул бакIчиначIа

МахIачкъала шагьрулул бакIчинал буржру чIумуйну биттур буллалисса Абуссупиян ХIасанов хьунаавкьунни фольклорданул ва аслийсса культуралул VIII Дунияллул халкьуннал дянивсса «Горцы» фестивальданул гьурттучитуращал.


Хьунабакьаврий мукунма бия хъуншагьрулул мэриялул аппаратрал каялувчи АхIмад Муртазялиев ва МахIачкъала шагьрулул культуралул управлениялул начальник Фарид Абалаев.

Шагьрулул бакIчинал барчаллагь увкунни фестивальданул гьурттучитурахь Дагъусттаннал, Аьрасатнал ва дунияллул халкьуннал аслийсса культура дуручлай тIий, фестивальданул лагрулий хьусса концертирттай ккаккан бувсса яргсса номердахлу. Цалва ихтилатраву кIицI лавгунни уку-укунсса фестиваллал регионнал ва хIукуматирттал дянивсса арарду цIакь давриву хъунмасса кIану бугьлагьишиву, шагьрулул каялувшинна мудангу хIадурну душиву ва журалул давурттавух гьуртту хъанан. Мунал фестивальданул гьурттучитуран буллунни дипломру ва хъамакъабитулунсса бахшишру.

Махъру лавхъунни Чачаннал Республикалул делегациялул каялувчи Рустам Осмаевлул, Къарачай-Чаргаснал Республикалул делегациялул вакил Ислам Салгапаровлул. А. ХIасановлун Исламлул пишкаш дунни фестивальданул гьурттучи Динара Кардановал дурсса пюрундалул сурат. Муний бивхьуну бия Иван Грозныйл кIилчинмур кулпат – паччахI Мария – къабардиннал кинияз Темрюклул душ.
Шагьрулул бакIчинан бахшишран гьурттучитуравасса цаппараннал щаллу бунни музыкалул номерду.

Бадрижамал Аьлиева

Читайте также: