«Зунттал халкьуннал» нюжмар

[dropcap]С[/dropcap]айки нюжмардул мутталий жулла республикалий най дия дунияллул халкьуннал дянивсса «Зунттал халкь» («Горцы») тIисса фольклорданул ва аслийсса культуралул VIII фестиваль. Му хьунни «Аьрасатнал культура (2012-2018 шинну)» тIисса Федерал программалул лагрулий.


[dropcap]Ф[/dropcap]естиваль сакин дурну дия АьФ-лул ва ДР-лул Культуралул министерстварттал, Аьрасатнал ва ДР-лул Халкьуннал творчествалул къатрал, ЮНЕСКО-лул иширтталсса байсса АьФ-лул Комиссиялул Дагъусттаннал отделениялул Материал дакъасса культуралул комитетрал.
Фестивальданувух гьуртту хьун жулла республикалийн бувкIун бия Словакиянавасса, Руминнавасса, Польшанавасса, Азирбижаннавасса ва Аьрасатнал 12 региондалиясса коллективру.

[dropcap]Ф[/dropcap]естивальданул лагрулий хьусса цаппара шадлугъирттая кказитрал хьхьичIмур номерданий чивчуссия. Муния махъ Р. ХIамзатовлул цIанийсса Национал библиотекалий хьунни «Международное сотрудничество как средство сохранения и развития этнокультуры, межнационального мира» тIисса ккуркки стол. Мунивух гьуртту хьунни ДР-лул культуралул министрнал буржру чIумуйну биттур буллалисса Зарема Буттаева, мунил хъиривчу – Халкьуннал творчествалул къатлул директор Марита МухIадова, чил билаятирттаясса ва Аьрасатнал регионнаясса творчествалул коллективирттал каялувчитал, Аьрасатнал Халкьуннал творчествалул къатлул отделданул каялувчи Юлия Иванова, Москавлия увкIсса оьруснал костюмру датIу Сергей Глебушкин, жула республикалиясса аьлимтал, фольклористътал, искусствоведътал.

Культуралул министрнал цилва ихтилатраву чIурчIав дунни «Горцы» фестиваль хъанай душиву жулла республикалул культуралул ца брендну, яргсса кккаккияну.
Марита МухIадовал, Польшанава бувкIсса коллективрахь ихтилат буллай, дакIнийн бувтунни Закопане шагьрулий ванияр цимирагу шинал хьхьичI дуллай байбивхьусса, жулла республикалиясса коллективругу цимилгу гьуртту хьусса, фестивальданул хъит учин бувшиву Дагъусттаннайгу укунсса фестиваль дуван.
Юлия Ивановалмур ихтилат бия Аьрасатнал Халкьуннал творчествалул къатлул щаллу дуллалими давурттаясса.
Ккуркки столданул даврил хIасиллайн бувну кьамул дунни резолюция.

«Фестивальданул открыткартту»

[dropcap]Ф[/dropcap]естиваль наниссаксса хIаллай Яруссаннал театрданул хьхьичIсса майданнив мунил гьурттучитурал ккаккан дуллай бивкIунни «Фестивальданул открыткартту» тIисса цIанилусса концертру. Родопский бульварданийн, хьхьирил зуманив сайрданий бувксса инсантураща вай гьантрай бювхъунни чил билаятирттал ва Аьрасатнал халкьуннал культуралий цал ххишалану тамаша буван.
Июньдалул 23-нний шикку хьунни ва фестиваль дайлитIаврин хас дурсса хъуннасса концерт.

Фестивальданул» щавщи бивунни Дарбантливгу

[dropcap]И[/dropcap]юньдалул 19-нний Дарбантуллал «Нарин-къалалий» хьунни фестивальданул ца яргсса кьини. Гьурттучитурал цала-цала балайрду ва къавтIавуртту хас дунни Аьрасатнал ва дунияллул ца яла хьхьичIвамур шагьрулун.
«Нарин-Къалалийн» бавтIми хъамалу буван буллалисса пулаврал кIункIурдал лув цIу пущу-пуркIу тIий дия, щала махIла нахIусса кьункьал ласун буллай.
Ва кьини шикку хьунни «Пагьламантал» тIисса циркрал искусствалул фестивальгу. Пагьламантурал буллалисса гьунардахунсса зюннав-накьарттул чIунил дара лавсун бия.

Халкьуннал янна-калул поэзия

[dropcap]И[/dropcap]юньдалул 20-нний Оьруснал театрданул хъунмур залдануву хьунни «Халкьуннал костюмрал поэзия» тIисса байран. Мунийн бувкIминнаща бюхълай бия дунияллул халкьуннал янна-калий тамаша буван, уттинин амухъал буттукьирттаву диркIминнуйн я щун бан. Байрандалувух, хъамал къахIисавну, гьуртту хьунни жулла республикалул районнугу, миннувух лакралмигу.

Хъамаллурал концертру – районнайгу

[dropcap]Ф[/dropcap]естивальданул кьинирдавасса цанний хъамал бивунни Къизлар, Избербаш, Буйнакск шагьрурдайн, УнцIукIуллал, Хъунзахъиял, Лаващиял районнайн, МахIачкъала шагьрулийн дагьайсса поселокирттайн. КIантту-кIанттурдай хъамаллурал ккаккан дунни ххаллилсса концертру. Миннансса жавабран кIанттул артистътуралгу ккаккан бунни Дагъусттаннал халкьуннал культура аьч дуллалисса музыкалул номерду. Сайки гьарцагу кIанай хъамал бувцунни экскурсиярдайгу. Дагъусттаннал халкьуннал культуралул, тIабиаьтрал, хъамал кьамул буван кIулшиврул чил билаятирттая ва Аьрасатнал регионная бувкIми хIайран бунни.

Гьурттучитал – республикалул БакIчиначIа

«Зунттал халкь» фестивальданул гьурттучитал цачIава кьамул бунни ДР-лул БакIчинал буржру чIумуйну биттур буллалисса Владимир Васильевлул. Хьунабакьаврий мукунма гьуртту хьунни ДР-лул ХIукуматрал председательнал цалчинма хъиривчу Анатолий Карибов, республикалул культуралул министрнал буржру чIумуйну биттур буллалисса Зарема Буттаева, мунил хъиривчу – РДНТ-лул директор Марита МухIадова, МахIачкъала шагьрулул бакIчинал буржру чIумуйну биттур буллалисса Абуссупиян ХIасанов ва м.ц.
Микку региондалул бакIчинал ва хъамаллурал дянив хьунни культуралул масъаларттайн багьайсса ихтилатру.

Халкьуннал щаращува

[dropcap]Ш[/dropcap]адлугъирттавух дия халкьуннал балайрду щаллу байминнал «Дагъусттаннал щаращив» ва музыкалул инструментру бищайминнал «Играй, душа!» тIисса байраннугу. Миннувух гьуртту хьунни Лакрал райондалиясса АьлихIажи Щамхалов, Ккуллал райондалиясса РайхIанат ХIажиева ва ЦIуссалакрал райондалиясса Аслан Муслимов.

«Ккавкказ – цасса кулпат»

МахIачкъала шагьрулул администрациялул ва культуралул управлениялул хIадур дурну, фестивальданул лагрулий хьунни «Ккавкказ – цасса кулпат» тIисса проектгу. Мунивух гьуртту хьунни Ухссавнил Ккавкказуллал регионнаясса творчествалул коллективру, мукунма чил билаятирттаясса ва Аьрасатнал цайми регионнаясса хъамалгу.

«Ттул Дагъусттан – ттул Аьрасат»

Июньдалул 22-нний щапI увкуну бувцIусса Оьруснал театрданул хъунмур залдануву хьусса «Ттул Дагъусттан – ттул Аьрасат» цIанилусса гала-концертрайну къуртал хьунни кIира шинай цал дувайсса «Зунттал халкь» фестиваль.
Фестиваль къуртал хьунни, амма муниясса чаннасса асардуми цукссагу хIаллай личIантIиссар мунивух гьуртту хьуминнал дакIурдиву.

Бадрижамал Аьлиева