[dropcap]Т[/dropcap]тул оьрмулуву чансса къавхьуссар, ттунма къатIайлану чIалачIисса, ссайн-унугу, щийн-унугу данди ацIансса, ччалли уккан­сса кIанттурду. Амма мукунсса ишираву, ци щавщи ттуйнма биярчагу,ттул рухI (дух) духкъашайссия тачIав.

---

[dropcap]М[/dropcap]иннувасса цану на ккалли дувара УзбакIнаву Бухара шагьрулий нава зузисса заманнай «Рашидовщиналул» мугьал­ттул ца щатIуйн къаршину ацIан багьну, мунища ттулла цIагу, къириятгу ххассал дурсса мутта.
1982 шинал Бухардал областьрайсса Вабкентуллал райондалий хьуна ризкьичитурал багьу-бизулун хас бувсса активрал мажлис.

[dropcap]Н[/dropcap]а та чIумал зий уссияв «Зооветснаб объединениялул» председательну. Микку обкомрал цалчинма секретарь Каримовлул цала лахълахъи­сса мукъуву (мунахьхьун буллуну бия баччан бувсса сведенияртту), ттул даврий ва ттуй аьй-бювкьугу дурну, увкуна: «Агарда мукун зий ухьурча, насувча цала шавайн кIихунай», — куну.

Залдануву кIилчинмур рядрай щяивкIун ивкIсса на ваца бакIрайх рирщусса куна хьунав. Амма, гава цIана ттула кIунттихьхьун навагу лавсун, пикри бав чара бакъа жаваб дулун. Ттун хъиннува бювххуна нава, цала акъа, чил инсаннан ккалли аву.

Цалчинманал махъ къуртал хьувкун, муданнасса проформалул журалий цIувххуна, суаллу бурив куну, щилчIав бур къаучиншивугу кIулну. ЩяивкIния лавайгу гьаз хьуну, на лахъну учав: «Ттул бур», — куну. Циняв пIаркь бивкIун бурувгунни ттул чулийнмай: Цалчинманал мукъул хъирив «щихьчIав ихтияр къадиркIссар» ци-бунугу ххи буллансса.

Ттул къелданул чIири-хъун­ши­ву чIаланшиврул хьхьичI дацIан дан аьркинссар та чIун ци чIун диркIссарив. Та дия Андропов итан цахъи хьхьичIсса чIун. Гьарца «Первый секретарь» (райондалул­сса, областьралсса, крайралсса) цана цува га кIанттул паччахIну чIалай ивкIссар, буллайгу ивкIссар цанма ччимургу, ца ххишалагу.

Ивзун, учав: «На увссара ши­ккува Бухаралив, ва ттуйнна тапшур дурсса давугу на цукун дуллай ивкIссарав, уссарав — районнайгу, утти Бухарнавугу кIулссар архIал зузиминнан, ттуя тIутIимур тIайла бакъасса затри…».

[pullquote]Ивзун, учав: «На ув­ссара шиккува Бухаралив, ва ттуйнна тапшур дурсса давугу на цукун дуллай ивкIссарав, уссарав — районнайгу, утти Бухарнавугу кIулссар архIал зузиминнан, ттуя тIутIимур тIайла бакъасса затри…».[/pullquote]

Мукун махъунай цайна инсан кIура аенссар тIий цукунчIав къаивкIсса Каримов анавар­сса бущилий увккун лавгуна. Сайки хIал баххана хьу­сса куна нагу авчура кьатIув бивкIсса ттула машиналучIан. Му чIумал ттучIан кIия адамина гъан хьуну, на зана ивтунав махъунай, увцунав хъамаллуран тIивтIуну бивкIсса дук­ралул мажлисрахун. Обкомрал шяраваллил хозяйствалул отделданул хъунмурну зий бивкIсса Анна Петровнал ттухь маслихIат бувна, ЦалчинманачIан увххун, багъишла ити уча куну.

Къагьанна учав на, уккан увача даврия, цанма ччимур бача. Му иш хьуна нюжмаркьини. Итникьини ттул даврийн увкIуна шама инсан – ревизия бан. Ряхва гьантлий ххал дуллай бия гьарца зат. Бахчинсса, вари чинсса цичIав къаляркъукун, щябивкIуна ттущал чяй хIачIан. Яла махъ кIул хьуна областьрал халкьуннал контрольданул начальникнайн Каримовлул тапшур бувну бушиву, ци лякъирчагу, ляркъуну, на даврия укьан ан.

Нава инжит уллантIишиву чIалай, ахиргу, чивчуну, на тIайла бувкссия нава рязину даврия укьлакьишиврул аьрза Ташккантлив – укьан аврил хIукму тиккусса хъунмур управлениялийн багьлагьисса буну тIий. Ялугьлан ивкIра жаваб­рах. Ттул даврийсса зузалтгу бия ци зунссарив къакIулну ливчIун. Най дия кьинирду, амма ца бази­сса хавар букIлай бакъая.

Ттула иш ссахун бивну бурив кIул баншиврул оьвчав Цалчинманал кумагчинайн. Танал ухьхьу увкунни ттухь цачIана, лавгра. Лахъи­сса столданул бакIрах щяивкIун ия лагь-лагьсса увцIусса инсан – лажиндарай пиш бувагу хIасул къашайсса куна чIалачIисса. ЩяикIу увкунни, щяивкIра. Яла танал най буна цIувххунни: «Циван гъалгъа тIий уссияв Цалчинманайн къаршину?» — куну. «Агарда танал насу вила шавайн тIисса зат къаувкуссания, на ссавурданий ацIантIиссияв», — учав нагу жавабран. Бувсмуних вичIигу дирхьуну, насу вила даврийн куну, на итаавкьунав.

Хъиривмур кьини кIюрххил оьвкуну ттуйн цачIана, пишгу тIий, СаэдахIмадовлул кунни: «На ттула хIукму цалчинна баххана буллали­сса», — куну.
Яла махъ-зуманив, хьумургу дакIнийн бутлай, пикри буллали­сса чIумал, ттухь цайминнал ув­куна: «Агарда ина танайн къаршисса ихтилат, щалва ил бавтIсса кIанттай къабувну, цамур журалий бувну бивкIссания, ина мукун кьювкьуну ххассал къахьунтIиссияв», — куну.

Ца шинавату, паммалул иширттал ялувсса хъун аваза сукку хъанахъисса ппурттуву, на цирив ца ттула иширал ялув най уссияв обкомрайн. Къатрал хьхьичI ялугьлай бавцIуну бия Цалчинманал машина. Дахьа ув­ххун нанисса чIумал, цакуну на тIайла авцIунав гива бувккун нанисса Каримов бакIчисса бюрорал члентурайн. Ваца итталату укьан куна, гикку авцIусса милицанал чулухун кIункIу хьуну, на аглан хьуссияв. Амма, хIисав хьуну ивкIун, ттул чулийнай кIурагу авну, Цалчинманал куна цачIан цан къауххара куну.

Муния махъ щалва билаят­райх ппив хьуссия УзбакIнал паммалуцIун бавхIусса криминал иширттал къалмакъал. Гдлянгу, Ивановгу бакIчисса бригадалул уголовсса жаваб­лувшиндарайн кIункIу бувссия зувиазарунная ливчусса инсантал.
На мяйжаннугу увссара Бухаралив. Ттун кIира шин хьу­сса чIумал, нину-ппу кIура бавну бувкIссар Дагъусттаннайн. Ттул ппугу, буттауссу Жаруллагьгу зий бикIайва заргалталну. Буттал ппу ивкIуну ия чахуткIалул оьрмулул 38 шинаву. Яхьуну ливчIун бур 1896-ку шинал буллусса ттаттал бакIрал чагъар (паспорт) ва Нижний Новгородрайсса ярмаркалий (мунийн жула лакрал учайсса бивкIссар «МакIарайл ярмукIа» куну) рирщусса мунал сурат-портретгу. Му ивну ия Москавлив, Санкт-Петербурглив, Варшавалийн, ИстIамлив. Жул агьлулун ирсирай най бивкIсса му заргалнал пиша кьабитан багьссар, мусиха зунсса ихтияр зерххусса совет замана бувкIукун.

Хъиривгу буссар
Жаруллагь Керимов