[dropcap]Г[/dropcap]ьар чIумух куна, «Илчи» буккайсса нюжмаркьини кIюрххила лавгссияв редакциялийн кказитрал хъирив. Шавай ияннин «Илчилул» ялтту уккайсса хасиятрал ттул янилун дуртунни 9-мур лажиндарай «КъадяличIантIиссар«Дараччилул» даву» тIисса макьала.Анаварну дуккав.

КутIану учин, мунил мяъна буслай бур цIанила. Аьпалувух бивхьусса Марияннул кьурахъул шиннардий дуллай бивкIсса жяматий­сса даву тапшур дурну дур Хасаева Гульшаннуйн.

---

[dropcap]М[/dropcap]у даврил хъирив кказит­райхчIин авцIусса ттун кIулли цуксса захIматсса, амма жямат­ран хайрсса ва бусравсса даву диркIссарив «Дараччул» дуллалисса даву.
Гульшан Рамазановна був­чIаву хъинну тIайлану дур­сса давур тIиссара, лакраву хьхьичIунмайсса хъаннил ккурандалул хъунмурну.

Гульшан бур гьар чулуха итххявхсса, инсаншиву дусса, дур­ккусса, ччима инсаннащал маз ля­къин бюхъайсса, пахру-ххара ба­къасса, му даврин бикIу, мунияр лахъсса хIукуматрал даврин бикIу лайкьсса инсан. Мунин кIулссар ккашилнал лякьагу, мякьнал кьакьаригу.

[dropcap]Х[/dropcap]хуй­сса нитти-буттал душри, ххуй­сса мяърипатрай дуккингу бувну, хъунма бувсса хIазран ба­къар, цахавагу, халкьуннахагу зун­сса хасиятругу хьун дурну Гульшаннуву. Ппу, Садикьхъал Рамазан, ЧIурттащатуссар, нину, Сарижат, Хъун ЦIувкIратуссар, ЦIуссачIурттахь бур чинсса чIя­ву оьрчIру бусса къатлул заллухъру бивкIссар ми, чин кка­ккиялунну зугу-зий, оьрчIругу хъуни буллай.

Гульшан, жу хъинну ххари­ссару му даврин вил цIа рищаврия. Лайкьманайн ва дан­сса бюхъу буманайнни мукун­сса даву тапшургу дайсса. Даву лажин кIялану дансса кашигу, цIуллушивугу чIа тIиссару жу вин. Жу вил чIарав мудангу бацIантIиссару.

КIивагу ЧIурттащиял
жяматрал цIания
ХIусайн Давыдов