[dropcap]Д[/dropcap]агъусттаннал паччахIлугърал университерал филологиялул факультетрай хьунни Дагъусттаннал хъунасса шаэр, чичу, таржумачи МахIаммад-Загьид Аминовлул 80 шиналюбилейран хас дурсса элмийсса конференция. Му хIадур дурну дия ДГУ-лул Дагъусттаннал халкьуннал литературалул кафедралул.

Зулайхат Тахакьаева
Цала хьхьичIмукъуву филологиялул факультетрал декан Шяъван Мазанаевлул ва Да­гъусттаннал халкьуннал литературалул кафедралул хъунама АгъарахIин Султанмурадовлул бувсунни МахIаммад-Загьид Аминовлул хъунмасса хIарачат бувну бивкIшиву цила чIумал Дагъусттаннал филологиялул факультет тIитIин.
Бувсунни мунал студентътал лекцияр­ттая мякь къалиххавай бикIайсса бивкIшиву, шеъри чичаврил, чIивисса бухьурчагу, гьунар бу­сса студентътурах ххишаласса къулагъас дуллай ивкIшиву.

[dropcap]Ш[/dropcap]аэрнал оьрмулул ва творчествалул ххуллия бувсунни тарихирттал элмурдал кандидат, шаэр, публицист Сулайман Мусаевлул. Шаэрнал шеърилугърал аьдатирттая ва цIушиннардая бувсунни ДГУ-рал Дагъусттаннал литературалул кафедралул доцент Ххазина Аминовал. Лак­рал ва Дагъусттаннал школар­ттай МахIаммад-Загьид Аминовлул творчество лахьхьаврия бувсунни А. Тахо-Годил цIанийсса Дагъусттаннал педагогикалул институтрал элмийсса зузала Фиразат Магьдиевал. Прозалуву хъярчру ва сатира ишла баврия бувсунни Дагъусттаннал паччахIлугърал педуниверситет­рал литературалул кафедралул доцент ПатIимат Шабановал.
Профессортал Кьадир Аьб­­­дуллатIиповлул ва ХIажи Гашаровлул кIицI лавгунни МахIаммад-Загьид Аминов ивкI­шиву мяш хьунсса гьавасрал ва шавкьирал заллу, мяйжаннугу­сса мукъул ссихIирчи.
-Так ца лакрал дакъасса, щала Дагъусттаннал литература авадан дансса поэзия дунияллийн буккан бувсса шаэрди МахIаммад-Загьид Аминов. Лак­ран хъунмасса бахтти хьуссар Аминовлул даражалийсса шаэр цала миллатрал дянива уккаву. Умуд бур миллатралгу шаэрнан лайкьсса кьимат бищунссар тIисса. ХIалалссар мунан халкьуннал чулуха гьайкал, — увкуна ХIажи Гашаровлул.
Ихтилатру бувуна ялагу Дагъусттаннал Чичултрал союзрал лакрал секциялул хъунама Илияс МахIаммадовлул, «Дагъусттан» ГТРК-лул хъунаманал хъиривчу Ссалам Хавчаевлул ва цайминнал.