[dropcap]М[/dropcap]айрал 29-нний ДР-лул БакIчинал кIанайма Владимир Васильев хьунаавкьунни АьФ-лул ПрезидентначIасса ишбажаранчишиврул ихтиярду дуруччу Борис Титовлущал. Муний гьуртту хьунни мукуна ДР-лул ХIукуматрал Председатель Артем Здунов ва цаймигу.
Хьунабакьаврий ххал бивгьунни региондалийн инвестицияртту дучIан дуллансса шартIру ххуй даврил ва проектру дузрайн дуккан дуллалисса инвестортуран паччахIлугърал чулухасса кабакьаву гьарта-гьарза даврил хIакъиравусса масъалартту.
Борис Титовлул бусаврийн бувну, республикалий аьркинну дур дузал дуван даркьусса шартIру, бизнес аьчухну, тIайлану дачин дулланшиврул.
Ванал республикалул хъунаманан ккаккан дурунни ишбажаранчитурал ихтиярду дуруччаврил институтрал дурсса давурттал хIакъиравусса справка. Справкалий ккаккан дурну дур республикалийсса цаппара диялдакъашивуртту ва захIматсса кIанттурду. Миннувасса яла хъунмурну хъанай дур «ххютулумур экономика».
Экономика ххютула дуккан дуваншиврул, бизнес лядукканшиврул аьркинну дур ишбажаранчитуран даркьусса шартIру дузал дуван.
Владимир Васильевлул бувсунни хIакьину Дагъусттаннал Верховный судрал зузалтран ккаккан увну ушиву цIусса каялувчи – Сергей Суворов. Мунал бувсунни бизнес дуручланшиврул судрал хьхьичIун ласласисса агьамми масъаларттая.
Язи-язими масъалартту дузрайн буккан баншиврул, Владимир Васильевлул пикрилий, аьркинну бур, циняв луртанну ва каширду цачIун дурну, щурущи дуллан. «Жу хIадурссару хIала-гьурттуну зун» , — увкунни Дагъусттаннал хъунаманал.
