[dropcap]Т[/dropcap]тул буттауссу, ХIажима­хI­мухъал Жяъпар МахIам­мадал арс, увну ур 1907 шинал ЧIяй­ннал шяраву. Оьрмулул 5-6 шин шайхту, буттал му шяравусса дурккучутурачIа кьуран лахьлан гьан айсса ивкIун ур. Яла цала маччачу Аьлилхъал Аьвдуллагьлущал Кьукнивсса мадрасагу бувккуну бур. Муния мукьах тIивтIусса дуниявий­сса школалул 4 группа бувккуну бур. Вана ва школалун 2012-кусса шинал хьуссар 100 шинал юбилей.

---

[dropcap]М[/dropcap]уния мукьах, дуккаврил итххявхсса ухьувкун, буттал цала арс уххан увну ур Щурагьиял реал училищалувун. Мугу ххаллилну къуртал бувну, цаппара цала гьалмахтуращал Жяъпар лавгун ур Ростовуллал университетравун ­уххан. Кув бувхссар, кувгу, бу­ххан къавхьуну, зана бивкIссар. Буттауссу Жяъпар увхссар геологиялул факультетрайн. Мунан хъинну гъира бивкIун бур жула Лаккуйсса зунттаву мяъданнах луглансса. Вайксса зун­ттаву я арцу-муси, я дувсси ягу навт бакъа къабикIантIиссар тIий икIайва тIар, аьпа биву. Вай гьарзад ттухь бусайва Жяъпардул чIивима уссуну хъанахъисса ттула буттал ХIусайннул.

1939 шинал Жяъпардул марцI­сса ххювардай къуртал бувссар Ростовуллал университет. Мунал дипломрай бивкIссар чивчуну «Инженер-геолог по цветным металлам» тIий. Яни, ва пишалул инсан хIисаврай Дагъусттаннай цалчинману хъанахъиссар.
Мура шинал буттауссу увцу­ссар армиялийн. Му диркIссар фашист жуйнма ххяххансса нигьачIаву ялун диллалисса чIун. Армиялияту му, лахъсса кIулшиву дусса, нажагьсса специалист ухьувкун, «броньгу» дуллуну, тIайла увкссар Тянь-Шянь тIисса Къиргъизнал зун­ттавусса арцу-мусил мяъданнай зун. Тикку му зийгу ивкIссар пенсиялийн укканнинцIа хъунама инженерну «Кансай» тIисса рудникрай. Мунан дуллуссар «За трудовую доблесть» медаль, ларсъссар «Къиргъизнал республикалул лайкь хьусса инженер-геолог» тIисса цIа.

ЦачIава зузисса Вера тIисса оьрус душгу бувцуну, буттауссу тиккува къатлул хьуссар. Сайки гьарца шинах куна, Лаккуйн иян, игьалаган учIайссия, аьпа биву. Фрунзелийн (цIанасса Бишкек) увкIсса цума-цагу ла­ккучунан, дагъусттанлувнан цащава шайсса кумаг байссия.
Буттауссил буссар кIива душ. Хъунмамур Элеонора Ма­хIаммадова зий бур США-наву Ухссавнил Каролиналий­сса университетраву, славян мазурдил профессорну. ЧIивимур, Татьяна Турчанова, Бишкекрай университетраву физикалул дарсру дихьлай буссар, элмурдал кандидатри.

1981-кусса шинал буттау­ссу лавгссар аьпалухьхьун. ХIу­куматрал ва жула диаспоралул тиккува хъунмасса хIурматрай увччуссар. Ттула буттагу лавг­ссия танал бивкIулийн.
Уку-укунсса жула лакрал лайкь­сса арсру ялун нанисса никиран хъамакъабитаншиврул чичав нагу ва макьала.

ХIажимахIмухъал Павел,
хIакин-хирург