[dropcap]М[/dropcap]ай зурул 12-нний Москавлий дагъусттан оьрчI Амир Абумуслимовлущал хьу­сса иширал хъунмасса аваза бувтунни инсантуравун. Ва иширал хIакъираву чIявусса бяст-ччаллийсса, хIатта миллатир­ттал дянив энадру бутлатиссагу ихтилатру най бур соцсетирдаву.

---

Андриана Аьбдуллаева
[dropcap]В[/dropcap]а иш хьунни Горькийл цIанийсса паркрал чIарав Андреевский ламуй. Шикку дуснащал нанисса, цичIав тахсир бакъасса Амирдуйх гужну бивщуну бур чIарах нанисса жагьилтурал кьюкьлувасса цаннал. КIулшилия лавгсса Амир «Анаварсса кумаграл» азарханалийн иян увну ур. Ва, няравун оь багьну, захIматсса тагьарданий ур.

Амир Абумуслимов Москавуллал Сеченовлул цIанийсса Медакадемиялул кIилчинмур курсрал студент ур. Дуклай унува ва зий ивкIун ур «Вера» фонд­рал хосписрай медбратну. Школагу мусил медалданий къуртал бувну, институтраву ххювардай дуклай ивкIун ур. Цинявппагу ва кIулми буслай бур Амир паракьатсса, аьмал-хIал бавкьусса жагьил ушиву.
Амирдуйх бивщусса Анвар Батиров Строительный колледж­рал студент ур. КIул хьуну бур ва хIала-ккаласса бияврил спортрахун агьсса ушиву. Анвар Батиров увгьуну ур. Ванай АьФ-лул УК-рал III-мур ст.1-мур бутIуйн багьлагьисса (данна тIий инсаннал цIуллу-сагъшиврийн захIматсса цIунцIия диян даву) тахсирну ккаклай бур.

[dropcap]В[/dropcap]а иш хьуну махъ соцсетирдаву хъунмасса аваза сукку хьунни ци дуллалиссар Москавлий­сса жула депутатътал, Дагъусттаннал вакилханалувуми, ихтиярду дуруччулт тIий.
Учин ччива, вайгу, цинявппагу дакIцIуцIисса дагъус­ттанлувталгу ва иширая архну къабавцIуссар. ХIакьинусса кьинигу хъирив бизлай, хъуннасса даву дуллай буссар тIайламур бацIан бан.

Мурад Кахриманов, Москавуллал шагьрулул адвокатуралул коллегия:
— Ва иширая баяйхту, жу хъирив бувкру. На хьунаавкьура Амирдул буттащал, гъан-маччанащал, ивра му усса азарханалийн. ЦIухху-бусу бав чIявусса инсантурахь – бардултрахь, дустурахь, архIал дуклакиминнахь. Ва оьрчIал хIакъираву кумаг бан ччисса 30-ннийн бияннинсса адвокатътал бувккунни. Так шанма гьантта лавгун махъ кIул увну, увгьуну ур тахсир хьума. БувчIлай бакъар циваннив, гава кьини хъирив бувккун, гара кьини дело сукку къадурсса. Жу, адвокатътурал группалул, ххал дарду уголов делолул материаллу. Уттиния тихунмайгу жу хъирив лаявуртту дуллантIиссару.
Ттул хъунмасса тавакъю бур дагъусттанлувтурахь миллатирттал дянив дичлачисса, энадру бутлатисса ихтилатру мабулларду тIисса. Ва оьрчIан хьусса бала кьурчIи къабивзсса цучIав акъахьунссар. ЖучIан чIявусса оьрус миллатрал адвокатътал, ихтиярду дуруччулт оьвтIий бур, ци кумаг аьркинни тIий, ми хIадурну бур жул чIарав бацIан.

Разита Мушидова, Дагъусттаннал Вакилханалийсса инсаннал ихтиярду дуруччаврил комиссиялул член:
— Ва иширал хIакъираву чIявусса инсантал оьвтIий бур Дагъусттаннал вакилханалул «горячая линиялийн». Соцсетирдаву чIявусса тIааьн ба­къасса, хъирив къалавсса, жуй аьй-бювкьурдугума буллали­сса ихтилатру бур. Жу, депутатътал, адвокатътал, ихтиярду дуруччин аьркинми, циняв­ппагу цачIун хьуну, ва иширал хIакъираву хъирив лаявуртту дуллай, цIухху-бусурду буллай буру. ТIайладакъашиву хьун къаритан личIлулну силистталул ялув бавцIуну буру. Уттинингу жу хъуннасса даву дур­ссар, хьумур кIул буллай, бардулт ляхълай. Уттигу жу паракьатну бакъа­ссару. Так жура дуллали­сса гьар цимурцаннуя цIана гъалгъа тIун хъанай бакъару, уттигу кIул банссагу, хъирив лалланссагу кIанттурду буну тIий.