[dropcap]О[/dropcap]ьрчIаву тIабиаьтрахсса ччаву цIакь дуллалисса экологиялул мероприятие хьунни вай гьантрай МахIачкъалалив, ХIамидовлул цIанийсса кIичIиравусса №8 библиотекалий. Ва хас дурну дия щаллагу дунияллий кIицI лагайсса ТIабиаьт дуруччаврил кьинилун ва экологиялул кIулшивурттал кьинилун.

ХьхьичI гьантрайра хIадур дурну дия экологиялул луттирдал выставка. Дуклаки оьрчIащал хьунабакьин оьвкуну бия «Дагестанский» заповедникрал экологтурайн – МахIаммадова Марияннуйн ва Ченчикова Светланайн. Бия шагьрулул 38-мур гимназиялул дуклаки оьрчIругу. ОьрчIан вичIи дишин гъира бутанну экологтурал бувсуна Дагъусттаннайсса тIабиаьтрал гьайкаллая, заповедникирттая, нажагьсса ва бухлаглагисса хIайвантрая, жанавартрая. Библиотекалул зузалтралгу хIадур дурну дия викторина, оьрчIру гъирарай жавабру дуллай бия суалла­хьхьун. Дуклаки оьрчIан тIабиаьт ва тIабиаьтрал хIикматру ла­хьхьин гъира бушиву чIалай бия, укун­сса мероприятиярттайн гъирарай бучIаванну тIий бия оьрчIругу, экологталгу.

Ажи Оьмарова,
библиотекарь