ЦIуллу-сагъшивруцIунсса маслихIатру

ЦIуллу-сагъшивруцIунсса маслихIатру

Цала цIуллу-сагъшиврул ялув авцIусса инсаннал цукунчIав ва чIун чIарах итакъадакьинтIиссар, ишла дантIиссар, бюхъайссаксса, цала дукиялуву уртту. Банкардавусса консервардаха цукунчIав лащан дан къабучIиссар интнил цалчинсса уртту-щин. Дуччин дувара зула организм цалчин­сса витаминнал.
— Салатирттавун дичин бу­чIиссар петрушка, гъаран (укроп), кьурчIу, кинза, базилик, шпинат, къалмул кIурхру, мечI, сан (черемша), къуппантIутIи (одуванчик), къурнил нувщуй шайсса бювчIусса кIут (сныть), нячIия.

КъуппантIутIи яла чIяруну хьунадакьайсса интнил цалчинсса щюллишиннар. Яла-яла хайр хъунмассар чIапIая. Вайннул цIакь дайссар, марцI дай­ссар ххюттука.
КъуппантIутIул щюлли­сса чIапIал щинал лажиндарал жиг­датIру гьан дайссар, инсан жагьилну чIалачIи айссар.
КъуппантIутIи кьурчIиссар, цинявннаща ми дукан къашай, мунияту чIапIив, батIайхтува, бишин аьркинссар 30 минутIрайсса, цIугу бивчусса, дяркъусса щинаву ягу, чIун дакъахьурча, щаращисса щин ялун дутIайссар.

Кьири мечI къакIулсса цу­чIав акъар, цурдагу жула столданий инттухуннай хъиннура чIяруну хьунадакьай мечIал дукрарду.
— Шиву чIявуссар витамин С. Къурувунияр чIявуссар каро­тингу. МечIал ххуйну гьаз байссар гемоглобин, оьттуву нацIушиву лагь дайссар, яла-яла иммунитет ххуйну гьаз дайссар.
МечIая дайссар накь, бичайссар салатравун, бучIиссар дагъ бангу (тушит), бучIиссар мечIащал хайжани бангу, хъинну нахIуссар.
МечI батIияра марцIсса кIан­ттава (къакьутIиншиврул, катIри лаххарчагу хъинни). Дяркъусса щинаву, къун-аьрщарацIа марцI хьуншиврул, цимилгу шюшияра. Ххуйну лицIангу бувну, бурусияра мюршну (цIана ттучаннай измельчителлу дур, минутIрай, каруннийнгу къа­кьутIлай, мечI бурусайсса). Ххя­ххиялул аьгъушиврий чимус дагъ бувара, ялун лагаврил касакгу бутияра, хъиннува нахIу хьун. Бичияра мюршну бурувсусса мечI (мечI цивппа ччяни шахьайссар). Ялун ккунукругу бувтIукун хьунтIиссар нахIусса тава. Ва дукралийн учайссар гугут куну. ЦIугу бакьин бувну – букияра. ИшттахI бишиннав.
ХIадур бувссар
Т. ХIажиевал
Р.S КIулну бикIияра, кьири мечIацIун хъинну дакьайссар гъаттарал, яттил аьгъусса дикI ягу май, так ми дурусин аьркин­ссар хъинну мюршну. Ххал дара, рязину личIантIиссару.

Читайте также: