[dropcap]М[/dropcap]артрал 12-нний ДР-лул БакIчинал кIанайма Владимир Васильевлул каялувшиврий хьунни республикалул муниципал сакиншиннардал каялувчитуращалсса видеоконференциялул низамрайсса батIаву.

Ххал бивгьунни АьФ-лул Президентнал бувчIавурттайн хIадур шаврил масъалартту. ЛичIину ххал бивгьунни ДР-лул Мюхчаншиврул советрал кьатIув хьунтIисса батIаврил хIакъиравусса масъалагу.

«Жура ххал дигьинну хъиривлаявурттал хIасиллу, мукунна бувчIавурттайн хIадур шавугу. Агарда уттинин захIматшивуртту диркIхьурча, ми жура цачIу духлаган дуван аьркинссар», — увкунни региондалул каялувчинал.

Къулагъасрайн лавсунни кугьна хьусса школардал масъалагу. Му бартбигьин ккаккан бунни «халкьуннал стройкалул» (методом народной стройки) – республикалул бюджетрава гьарца школалун 2 миллион къуруширттал личIи дуллай, лирчIми арцугу райондалул ягу шагьрулул каши дусса инсантурал счетирдая дичлай.

Бувсунни мукунма Буйнакск шагьрулул агьали щинал щаллу бан аьркиншивугу.
Дагъусттаннал БакIчинал кIанайманал районнал ва шагьрурдал бакIчитурайн тапшур бунни аьркинсса шартIру дузал дуван, гьарца шяраву ягу шагьрулий инсантал бувкIун, чIурду булун бю­хъаншиврул.

БатIаврий ялагу гьаз бунни зузалтрал политикалул ва налог­ру гьарзану дучIан даврил масъаларттугу.

* * *
Мартрал 14-нний Буйнакскалий ДР-лул БакIчинал кIанайма Владимир Васильевлул каялувшиврий хьунни Дагъус­ттаннал Мюхчаншиврул советрал кьатIувсса батIаву.
Микку ххал диргьунни мартрал 18-нний хьунтIисса АьФ-лул Президентнал бувчIавурттайн хIадур шаврил хIасиллу. Мукунма ххал бивгьунни Буйнакск шагьру ва район щинал щаллу даврил масъала.

Республикалул каялувчинал бусаврийн бувну, Буйнакск ва Буйнакскаллал район щинал щаллу даву – му хъинну агьамсса масъалар, цанчирча щаллусса шагьрулийн щин гьантлий дурагу 2 ссятрай дулаву рязи хьун захIматсса ишри. Респуб­ликалул исполнительный властрал цIанасса ппурттуву агьалинал оьр­му бигьа, ххуй бансса давуртту дуллай бур. Мува зат тапшур бувну бур вай гьантрай Дагъусттаннайн увкIсса АьФ-лул Президент В. Путиннулгу.

В. Васильевлул бувсунни строительствалул, налогирттал иширттавугу низам дишин багьну бушиву. Базардал, заправкарттал станциярттал, банкетру бай къатрал заллухъруннайн тапшур бувну бушиву налогирттая лакъабикIлан.

Буйнакскаллал бакIчи Исламуттин Нургудаевлул бувсунни шагьрулий щин диялну дакъашиврул хIакъираву ци бан багьлай бу­ссарив. Ихтилат бунни ДР-лул Халкьуннал Мажлисрал Председатель Хизри Шихсяидовлулгу.

Владимир Васильевлул бакI­райн лавсунни шагьру щинал щаллу бансса давурттан арцу итадакьин. Гара кьини ДР-лул БакIчи хьунаавкьунни шагьрулул жямат­ращалгу.

* * *
Вай гьантрай Дагъусттаннал ХIукуматрал Председательнал хъиривчунал кIанайма Рамазан Жяъпаровлул дунни 2018 шинал АьФ-лул Президентнал бувчIавурттайн хIадур шаврин хасъсса бувчIавурттал комиссиярттан кумаг баврил зузи группалул батIаву.

Видеоконференциялул журалийсса батIаврий гьуртту хьунни ДР-лул БакIчинал ва ХIукуматрал Администрациялул Каялувчинал 1-ма хъиривчу Владимир Деревянко, ДР-лул транспортрал, энергетикалул ва связрал министр­нал цалчинма хъиривчу Арслан Арсланов, ДР-лул МЧС-рал надзорданул иширттал управлениялул хъунаманал хъиривчу Илдар Хамавов, «Дагестанская сетевая компания» АО-лул директор Муртазяли Гитинасулов, респуб­ликалул муниципал сакиншиннардал вакилтал.

БатIаврий хьхьичIмахъ лахълай, вице-премьернал кIанайманал бувсунни АьФ-лул Президентнал бувчIавуртту хъанахъишиву гьашину яла агьаммур политикалул давуну.
— Жува хIадурну бикIан аьркин­ссару му даву лайкьсса даражалий бартдигьин, — увкунни мунал.

Рамазан Жяъпаровлул бусаврийн бувну, ДР-лул ХIукуматрал ХIукмулийну цIакь бувну бур бувчIавурттал давурттаха зунсса жаваблувсса инсантал. Мунал мукунма бувчIин бунни «Выборы» тIисса ГАС-раха (Государственная автоматизированная система) зун­сса инсантал хIадур бувну бушиву. Мунал бусаврийн бувну, 381 участокрал бувчIавурттал комиссиялий дузал дурну дур чIурду булаврил видеотрансляция дуллансса ва видеорегистрация дуллансса кьай-кьуй.

Ми иширтталсса буллансса зузалт хIадурну бур бувчIавурттайн. Мукунма хIадурну бур инсантурал телефондалувух оьвкуну диялдакъашивурттаясса хаварду кьамул бувайсса зузалт. Сакин бувну бур технологиялул чулухасса диялдакъашивуртту духлаган дансса 55 бригада.

Ихтилат хьунни мукунма цIу дагьавриясса нигьачIаву хьун къаритаврил хIакъиравусса, чани лещарчагу тIий, луртандалунсса чирахъру лахъаврил система дузал давриятугу.

БатIаврил хIасиллу дуллай, Рамазан Жяъпаровлул бавтIминнайн тапшур бунни ялун ливчусса циняв масъалартту дузал буван ччя­сса чIумуй.

ХIадур бувссар
ХI. Аьдиловлул