[dropcap]Ш[/dropcap]колалий дарс дихьлай бивкIсса учительтурал чулуха ттун ттунма хъинну хъунмасса тIайлабацIу хьуссар. Миннавату ляличIинува ттуна дакIний ливчIсса цанная – МахIаммадлул арс Нураттин Маммаевлуя учин ччай ура ца-кIива махъ.
[dropcap]Н[/dropcap]ураттин Маммаев ия ххишала акъа гьунар ххисса педагог, пикри куртIну щурущисса инсан. МунайхчIинъя ттун оьрмулухун ххира хьусса математикагу. Дарс дихьлахьисса чIумал Нураттин МахIаммадовичлул лякъайва лях-карах иширацIун хъинну бавкьусса хъярч-махсара бансса мажалгу. Масала, колхозирттацIун бавхIусса ихтилатраву чинтIиссия:«Гьавалул тагьарданухгу къабурувгун, колхозирттал ларсун дур ххуйсса бакIлахъия. Амма цирда ….тIурча, чув дуссарив къакIулссар, дакъассар», — куну.
Ххаллилну аккордеонгу бивщуну, мунал учайва балай. МуначIа шаппа бикIайва нажагь бакъа хьунакъабакьайсса 12 ххал дусса мандолина. Мугу бищайва усттарну.
Университет бувккуну махъ, тIайла увккун, на увкIссияв райондалийн, зий уссияв математикалул учительну ЧIарттал шяраву. ЧIал къавхьуну на ивтунав райкомкомсомолданул 1-ма секретарьну. Му чIумал хъиннура гужлан хьуна Нураттин МахIаммадовичлулгу, ттулгу дянивсса дусшиву. Жу мунащал архIал лагайссияв Читтурдал шяравунгу, бияйссияв ЖахIпар МирзаевлучIан, Башир ГъапуровлучIан, Харус РамазановлучIан.
КIицI къадурну кьаритан къахьунссар тай шиннардий Гъумучиял цIанихсса школалий дарсру дихьлай бивкIсса ялагу цаппара ххаллилсса педагогтурал цIарду: Эльза Алексеевна (физика), Алла Ивановна (химия), Аьжа Шяъбановна ва Мариям Ибрагьимовна (кьатIаллил маз), Шамай Абаевна (оьрус маз), Султан-ПатIимат ХIасановна (биология), Шяпи МахIаммадович (физика), Ибрагьим Исмяилович (директор). Ми хъамабитан шайсса учительтал бакъая.
Нураттин МахIаммадовичлуя дакIнийн бичинмур тачIавгу чан бакъар. Хьунссар сакин бан дакIнийнбичавурттал жужгума. Бангу аьркинни.
Цуксса хIайпнугу, Нураттин МахIаммадович жуятува ччяни личIи хьунни. Амма цал духьурчагу мунал дарс дирхьусса, мунащал щяивкIсса, ивзсса инсаннан мунал цIагу, аьпагу цукунчIав хъамакъабитайссар.
Нураттин Маммаевлул 90 шинал юбилейрацIунгу бавхIуну, хъинну тIайласса, хIакьсса давуну хьунссия мунал аьпа абад баву, цуппа Гъумучиял школалунгу, цания-ца кIичIираваллингу мунал цIа дизарча.
Шагьимардан Мудуев,
географиялул элмурдал
доктор, профессор
