ДР-лул Премьер-министр Артем Здунов вай гьантрай кIул хьунни республикалул ЦIуллушиву дуруччаврил министерствалул давурттащал.

«Ттул мурад бур хIакьину министерствалул зузалт­ращал кIул шаву. Бусира зулла давурттаяту, захIматшивурттаяту, зущава бюхъаймунияту ва ялун личин бюхъайсса каширдаяту. Минздраврал каялувшиврий­сса медициналул цаппара учреждениярттащал на кIул хьура, асар биян бунни, ливчIминнущалгу хIалли-хIаллих тIий кIул хьунна», — увкунни ХIукуматрал Председательнал.

ЦIуллушиву дуруччаврил министерствалул давурттаяту ихтилат бунни министрнал кIанайма Танка Ибрагьимовлул. Мунал бувсунни Президентнал майрал хIукмурду бартбигьаврил ххуллий дурсса давурттая, медициналул идарартту кьай-кьуйлул дузал баврил тагьардания, автопаркирал тагьардания, районнай буллай бачIину ливчIсса азарханардая.

Артем Здуновлул пикрилий, аьркинни дуван инвентаризация.
«Жу жувагу биянну азарханардайн ва поликлиникарттайн, ххал банну тиккува миннул багьу-бизу, лащу-щаллушин», — увкунни Артем Здуновлул.
Хьунабакьаврий ххал бивгьунни цаймигу масъалартту.

***
Гара кьини ДР-лул ХIукуматрал Председатель кIул хьунни Юстициялул министерствалул иширттащалгу. Хьунабакьаврий ххал бивгьунни му министерствалул бартбигьин аьркинсса яла агьамми масъалартту. Министрнал кIанайма Ханлар Пашабековлул бусаврийн бувну, республикалий зий бур 130-нния ливчусса дакьаврил судиятал. 2017 шинал миннал ххал бивгьуну бур 187 азаллий 543 силистта. Дянивну лавсун Да­гъусттаннай ца дакьаврил судия ххал бигьлай ур зуруй 136 силистта.
Ххал бивгьунни паччахIлугърал граждан тагьарданул регистрациялул масъаларттугу. Ихтилат хьунни уквасса юридийсса консультациярттал офисру тIитIавриягу, районнай юридийсса хIаллихшиннарду бартдигьлансса техникалул дузал бавриягу. Миккува гьаз бунни архиврал иширттаву законну дуруччаврицIун бавхIусса масъаларттугу.
«Юстициялул министерство, ттул пикрилий, хъанай бур циняв министерстварттал юридий къуллугъирттан кумаг буллан аьркинсса агьаммур методикалул орган. Мунияту жува зун аьркинссару ца­сса командану», — увкунни Артем Здуновлул.
***
Вайва гьантрай Дагъусттаннал ХIукуматрал председатель хьунаавкьунни республикалул ЗахIматрал ва социал лябуккулул министерствалул зузалт­ращал. Му министерствалул каялувчи Расул Ибрагьимовлул бувсунни ведомствалул гьашину бартбигьин аьркинсса масъаларттая, мунал хъиривчутурал, управлениярттал каялувчитурал ихтилат бунни цалла давурттая ва захIматшивурттая. Мукунма ххал бивгьунни профориентациялул, зузалтрал хIакъиравусса, зузи кIанттурду гьарза баврил ва цаймигу масъалартту.
Артем Здуновлул тапшур бунни муницIун бавхIуну ккаккан дуван приоритетру: «Зузалт хIадур буллан аьркинссар дянивми ду­ккаврил даражалул идарарттал гьанулийва», — увкунни мунал.
Ихтилат хьунни мукунма къаформалсса зузи кIанттурдал хIакъиравугу.