[dropcap]М[/dropcap]артрал 7-нний МахIачкъалалив, Оьруснал драмалул театр­данул Хъунмур залдануву, хьунни Хъаннил байрандалун хас дурсса хъуннасса концерт. Му сакин дурну дия МахIачкъала шагьрулул администрациялул ва шагьрулул культуралул управлениялул ДР-лул Культуралул министерствалущал цачIуну.

Бадрижамал Аьлиева
Хъами барча буллалисса махъ лавхъунни ДР-лул БакIчинал буржру чIумуйну биттур буллалисса Владимир Васильевлул:
— Хъаннияр ххирасса ва аьзиз­сса цир дикIан бюхъайсса!? Ялапар хъанахъияра талихI буну ва лахъисса оьрмулий, хIурмат бу­сса хъамий! Зу буру караматсса гьунарданул заллухъру, цуксса хIайпнугу, жул, арамтурал, ба­къасса: зуща бюхълай бур карьера дуван, искусствалуву, творчествалуву, хъуруннай ва лухччай лябукку хъанахъи бан. Мунищала архIал зул кару хъирив лаллай дур ичIаллилсса, оьрчIалсса бувангу, жулсса, арамтуралсса, бувангу. Барчаллагь зун хъунмасса ми цимурцаннухлу.

ХIакьину ттун хъунмасса бахтти хьунни цинявппагу арамтуннал цIанияту зухь вай махъру учинсса.
Ттун ччива жула Аьрасатнал Президентнал махъру кIицI лаган, рисалалуву уттигъанну увкусса:
«Сивсусса хияллу мудангу тIайла бувну бикIайссар хъуни-хъунисса мурадирттайн, жува аьркинссар гьарцагу оьрчIаву бусса гьунар ялун личин буван», — тIисса. Дагъусттаннай тIурча, мукунсса тагьар хIасул хьуну дур ччянира, ялун бучIантIимунил къалип хъунмурчIин хъаннил бутIлатIисса. Хъами – ми ххаллилсса учительталли ва насихIатчиталли. ОьрчIал дакIру, хаснува школалийн гьаннинсса оьрмулувусса, хъинну асар шайсса, ттюнгъасса дикIай ва миннуйн зарал къабияншиврул цукссагу ссавур ва личIлулшиву аьркинну дикIай, хъанниву дур му ссавур ва личIлулшивугу.

Хъаннил байрандалул хьхьичI гьантрай жу, арамтуннал, жухьхьунма жува суал булун аьркинссар: «Цири жура хъаннил цIаний дурсса?» — тIисса. Дуванмурдив чIярур.
Барча тIий зул байран, чIа тIий ура цIуллушиву зун ва зун ххираминнан, — увкунни Республикалул БакIчинал.
Гихуннай республикалул язими коллективирттал, эстрадалул балайчитурал ккаккан дунни яргсса концертрал программа. Ва кьинисса махъругу, къавтIавурттугу, балайрдугу хъаннин хас бувну бия.

* * *
Хъаннил байрандалун хас дурсса концерт хьунни Къумукьнал театрданувугу. Ва дия классикалул музыкалул концерт.
Тамашачитурал хьхьичIун ва кьини бувккунни Дагъусттаннал паччахIлугърал опералул ва балетрал театрданул хор (театрданул художествалул каялувчи, Дагъусттаннал искусствалул лайкь хьусса ишккакку Наталья Макеевал каялувшиндаралу) ва Республикалул симфониялул оркестр (дирижер, Аьрасатнал, Дагъусттаннал ва Чачаннал халкьуннал артист Валерий Хлебников). Ва кьини миннал щаллу бунни дунияллул ва Аьрасатнал классикалул язи-язими произведенияртту.

* * *
Поэзиялул театрданувугу байрандалул хьунийн­сса концерт ккаккан дунни МахIачкъала шагьрулул П.И. Чайковскийл цIанийсса 1-мур ОьрчIал искусствалул школалул. ОьрчIал ва преподавательтурал щаллу бунни П.И. Чайковскийл, А. Хачатуряннул, А. Бабаджаняннул, Р. Паульслул, Ю. Чичковлул ва чIявусса цайминнал произведенияртту.
Школалул уттинин цикссагу шиннардил мутталий цIакь хьусса аьдатругу дурурччуну, цIанасса мунил директор Саида Исмяиловал, мунил хъиривчу Гульнара Юнусовал ва лавайсса даражалул пишакартурая сакин хьусса щалагу коллективрал хъинну ххуйсса программа хIадур дурну дия. Ва концерт хьунни Поэзиялул театрданул ва ОьрчIал искусствалул 1-мур школалул уртакьсса даврил цалчинсса шачIану.