[dropcap]С[/dropcap]салам аьлайкум, гьалмахтал! Цаппара гьантрал хьхьичI, гъан-маччанал тIайла бувккун, ттучIан бивунни «ГьунчIукьатIрал тарих» тIисса Амин Аьбдуллаевлул сакин бувсса лу.Хъунмасса гъирарай кIива гьантлул дянив бугу-буккав. Утти ва Аминнул арилчинсса лу хъанай бур. Оьрмулул шиннардих къаурувгун, зирангшиврий, хъунмасса захIмат бивхьуну, лайкьсса даву бакIрайн дуккан дурну дур Аминнул. ЦIуллу аннав цув!

---

[dropcap]Л[/dropcap]уттиравусса гьарцагу хху­ттаву чIалай дур авторнал цала чIири ватандалухсса, жяматрахсса ччаву, мякь. Мяйжаннугу, цала буттал шяраву ххуймунил, хъинмунил кьадру буну ччай, гьарца иширай дакI цIуцIисса адамина ур Амин, гьарцагу шяраваллил цала хьурдай учинсса чув ур.

Бур луттираву цаппара­сса гъалатIругу – инсан увсса, ивкIусса шиннардиву ва цаймигу кIанттурдай. Хъунмасса лу­ттираву мукунсса гъалатIру ба­къагу къаличIайссар. Мисалдаран, ттул къатлуву, цала кулпатращал МахIаммад Аьбдуллаев увкIсса чIумал, рирщусса суратрай (339 лажин) ттул цIа Ш. Къардашов куну чивчуну бур. За бакъар, къаччан бикIлай акъара.
Гьай-гьай, цумур-цагу лу хIадур бан къабигьассар. Циксса материаллу, суратру, халкьуннал оьрмурдаясса чичрурду датIин аьркинну дикIай.

Аминнул лу жула щарнил гьарцагу чувнал ужагърай бикIан лайкьсса лу бур. «Илчи» кказитрайхчIин хъунмасса барчаллагьгу тIий, чIа тIий ура Аминнун цIуллушиву, каши-кьудрат ва тIайлабацIу. Пахрулий ура Аминнул дурсса даврия!

Даниял Шабанов,
ш. Москав