[dropcap]В[/dropcap]а гьантрай хьунни Республикалул клиникалул азарханалул хъунама хIакин Ибрагьим МахIаммадовлул пресс-конференция. Муний ганал бувсунни РКБ-лул гьанулий бувну бушиву Спортрал медициналул центр ва лучевой диагностикалул ва лучевой терапиялул центр ва ми зий бушиву «Гамма-нож» тIисса аппаратрацIун.
«Ми кIивагу центр дузал баншиврул, щаллусса зивулий дахханашивуртту дурну дур (зивулул лахъишиву дур 110 метра). ЦIана палатарттаву зий бур хIаммам (душевая), бур личIисса туалет, телевизорду, кондиционер, WI-FI ва даву лархьхьусса зузалт.
Дагъусттаннал хирургтал-ортопедтал ва реабилитологтал Германнавун ва Польшанавун лавгун бивкIссар сянат лахьхьин. Тийх буссар FIFA-лул ва МОК-рал сертификацияртту дусса клиникартту. Хъинну захIматсса цIунцIияртту хъин дан бюхълай бур цIана жул пишакартураща», — увкунни И. МахIаммадовлул.
Мунал бусаврийну, Центрданийн бучIантIий бур ляличIисса аппарат, мунил кумаграйну 10 спортсменнавату ялун уккансса яла итххявхма, яла бюхъу-хъит бума спортсмен кIул уван бюхъантIий бур ганал генетикалийн ва физиологиялийн чул бивщуну.
МахIаммадовлул мукунма бувсунни Лучевой диагностикалул центрданул ва «Гамма-нож» аппаратрал хIакъиравугу. Му бур хъинну чара бакъа аьркинсса, багьлул ххирасса аппарат. Му центр тIитIин бювхъуну бур инвестортурал кумаграйну, минналва лавсун бур му цIусса аппаратгу. «Гамма-нож» аппаратрах байссар радиохирургиялул операцияртту.
Му аппаратрах духлаган дайссар няракъатлувусса дурухлурду гивун га аппарат къабуххан бувна, ягу кьукьаву къадурнура. Му аппарат бучIантIий бур август-сентябрьданий. Операцияртту буллантIиссар я федерал квотарттайну, ягу ОМС-рал счетрайну. Миннуя инвесторнангу бутIа ккаккан бантIиссар. Мукунсса аппаратру Аьрасатнаву бусса бур 6, утти 7-мур хьунтIиссар жучIава. Мунил кумаграйнусса операцияртту буллантIиссар Ухссавнил Ккавкказуллал округрайгу.
И. МахIаммадовлул журналистътурал
суаллахьхьун дуллунни жавабругу.
ХIадур бувссар
ХI. Аьдиловлул
