Февраль зурул 9-нний Москавлив ХIукуматрал Къатлуву хьунни 2016 шинал­сса ХIукуматрал премияртту дуллалисса шадлугъ.

П. Рамазанова
Шикку гьуртту хьунни Аьра­сатнал ХIукуматрал председательнал хъиривчу Ольга Голодец ва Аьрасатнал КIулшиву дулаврил ва элмулул министр Ольга Васильева. Миннал 19 лауреатнан премияртту дуллунни . КIулшиву дулаврил аралуву жула лаккучу, медициналул элмурдал доктор, профессор, Аьра­сатнал паччахIлугърал медициналул академиялул факультетрал декан Абакаров Сяъдуллагь ХIукуматрал премиялун лайкь хьушиву жу утти­нингу баян бувссия. Кказитрал цIаниятугу, щалвагу миллатрал цIаниятугу лауреат барча уван жу Сяъдуллагь ИбрагьимовичлучIан оьвчарду. ХIалу дагьайхту, мунащал хьунабакьин икьрал дуварду. Цал уттигу дакIнихтуну барча уллай буру лауреат бюх­ттулсса премия ласаврищал, чIа тIий буру цIакьсса цIуллушиву, утти­ния тинмайгу дуллалимуниву тIайлабацIу.