«Илчилул» буккултран кIулссар ларгсса шинал, щалва миллатгу лагма лавгун, шадлугърай дуршиву кказитрал 25 шинал юбилей. Кказит итабакьлакьисса шиннардил мутталий, гьай-гьай,жул дакIру ххари дуллалисса ва зунсса гъира-шавкь цIакь дуллалисса чIарахбацIулт бия кказит тIалав буллалими, цукунсса чIунну дучIарчагу, буттал улклуйн ва ниттил мазрайн хаинкъавхьуми, багьантту хьхьичIун къабугьлай, ниттил мазрайсса кказит-журналлу ужагърайн бучIан буллалими, иширайну цанма ниттил маз ххирану бушиву ккаккан буллалими. Чансса бакъар мукунсса инсантал республикалул кьатIушавгу, архсса регионнайгу, хIатта цайми билаятирттайгума.

ПатIимат Рамазанова
Мукун ниттил мазрахсса ччаву оьтту-ттурчIаву цIакь хьу­сса ва узданну ядуллалисса инсан бур ЧIяйннал шяравасса, Таканаву Чаржав шагьрулий яхъанахъисса, КьубатIаева Рабият. Ванил мудангу гъирарай буккайсса бур «Илчи» кказитгу, «ЦIубарз» журналгу. Рабият бур Дагъусттанная увкIманая яла хъунмур ссайгъат цинма миллатрал кказит-журналлур, му кьини яла бусравми хъамал тIювайн бувкIссаксса шара тIий. РабиятлучIан «Илчигу», «ЦIубарзгу» биян бувайссар цила иширай ччя-ччяни Чаржаврайн лагайсса ванил маччадуш Аьбидова Муъминатлул.
— Мяйжаннугу ссавур дакъа ялугьлан бикIай Рабият на кказитру ва журналлу лавсун бучIаннин, цуппалу щябивкIун ккалай, неъмат ласара тIун бикIай. Ва буниялттунгу мякьну бикIай ватандалиясса хавардах, ниттил мазрайсса чичрурдах, — тIий бур лакку кказитру ва журналлу цинмагу ххирасса, мудан тIалавгу бувайсса Муъминат.
Гъурбатрай миллатралмуних ххишалану ххуцI буккайхьунссар, гьай- гьай. ХIакьину лак ватандалийнияр, Да­гъусттаннайнияр чIявусса чил кIанттурдай мина-гьанулул хьуну бур. ЧIявусса бур миннаву, так кIанттул шаврий гьашиву дурну, ватандалущал сайки цукунчIавсса дахIаву дакъа яхъа­нахъисса ва му къа­ххуйшивуну къачIалачIисса. Амма бур, Рабият кунма, мудангу ватандалия­сса хавардахгу, ниттил мазрай­сса кказит-журналлахгу мякьнувасса, ни­ттил мазрайсса пресса­лущалсса дахIаву хIура дуккан къадитлатисса. Аьбидова Муъминат буслай бур Рабият Чаржаврайсса лакрал хъатIи ххуй бай­сса, бивкIулий кьулгьу-кьуран буккайсса, агьалинал дянив хIурматрайсса инсан бушиву. Рабиятлул ниттил Гьидаятлул дувайсса диркIун дур бивкIу-буккулул аьдатру, ниттил кIану бувгьуну, утти Рабият оьнийгу, хъиннийгу агьалинал чIарав бацIлай бусса бур. Чаржаврай­сса лакрал «жунма бакъа чара бакъасса Рабият» учайсса бур ванийн хIурматрай. Вай гьант­рай бувкIунни жул редакциялийн Рабиятлул шеърирдайсса ссалам, халкьуннал шаммардал зумувнусса:

Гьава бан барзу хьурдай,
Леххан лелуххи хьурдай,
На левххун бучIавияв,
«Илчи» ккалай щябикIан.

Насула, гъарив, чагъар,
Мурчал лавс чIапIи кунма,
«Илчилийн» баян бува
Ва ттул дакIнил леххаву:

Нюжмар хьхьуну ав тIисса
БурцIин бутIа бай Аллагь!
Жугу буру тамахIну,
Буттал кIану хьурдай тIий.

«Илчилул» коллективран
ТIайлабацIурду чIа тIий,
Дуаьрдай буссару жу,
Лакрал иш бюхъаннав тIий.

Чаржавраясса Рабиятлул чагъарданул дакIнийн бувтунни жун ссаламругу бивхьуну, кувннал кувнначIан чагъарду чичай замана. Гьарца чагъаргу байбишайссия «ЧIявусса ссалам хьуннав» тIий, яла ялунгу чара бакъа ххи дайссия «ссавнийсса цIурттиксса», «лухччинийсса урттуксса», «неххамачIув ххюлуксса» тIисса калимар­тту. Лакку билаятрал тIин бусса чагъарду, гьаннайсса. БувкIунни жучIангу мукунма лакку билаятрал тIин бусса, дахьва кIарттува бувксса ччатIул гъилишиврущалсса чагъар КьубатIаева Рабиятлуя. Барчаллагь вин, Рабият, гъурбатрайгу Лакку улклуйн хиянатшиву къадувай­сса. ЦIуллушиву дулуннав ви­хьхьун, бартлаганнав дакIнийцири мурадру!
Рабият тавакъю буллай бур хасну цила цIаниятугу, Чаржаврайсса лакрал цIаниятугу «Илчилул» душругу, цинявппа ла­кку душругу барча бувара тIий Хъаннил байрандалущал. Жугу ххарину бартбигьлай буру Рабиятлул мурад. Барча зул байран, ххирасса лакку хъамий! ЦIуллушиву дулуннав зул кулпатирттахьхьун, нахIушиву, ттюнгъашиву, барачат яла къагьаннав зул ужагъирттая!