«Жула Каспий хьхьири»

«Жула Каспий хьхьири»

todfo_5КIулсса куццуй, ва шин Аьрасатнаву баян бунни Экологиялул шинну, Дагъусттаннай – Каспийлул шиннугу. Му иширан хас дурсса «Жула Каспий хьхьири» тIисса цIанилусса батIаву хьунни Каспийскалий ЦБС-рал 4-мур филиалданий.

Бадрижамал Аьлиева
БатIаву тIиртIуну, ЦБС-лул методист Зугьра Давудовал бувсунни экологиялул шинал мутталий щинал объектир­ттай дуван дакIнийсса давурттая, щинал объектру инсаннаясса нигьачIаврия мюхчан даншиврул, заралдания дуруччиншиврул.
Шагьрулул 6-мур школалул ва 8-мур лицейрал дуклаки оьрчIал бувсунни Каспий хьхьирил тарихрая, мунил ххяххияр­ттал ва жанавартирттал дунияллая. Бувсунни Каспий хьхьирий бушиву 50-ннийн бивсса жазирарду, мунивун най душиву сайки 130 нех, щаллагу дунияллий бугьайсса осетровый балугърал 90-нния ливчусса процент жула хьхьирива бугьайшиву. Дуклаки оьрчIал дурккунни Каспий хьхьирихасса назмурду, Расул ХIамзатовлул, Юсуп Ха­ппалаевлул ва цайми шаэртурал чирчусса.
БатIаврий ккаккан дунни Кас­пий хьхьириясса видео­фильмру.
Филиалданул хъунмур Пакият Раджабовал цилва ихтилатраву чIурчIав дунни Каспий региондалул аьмсса экологиялул объектну хъанай бушиврий ва мунил цания ца бутIуй хьу­сса кризис кIура даен бюхъайшиврий экологиялул аьмсса балаллийн, цувгу ахирданий гьарцагу паччахIлугъран цила-цила ххуллий асар хьунсса, муниятугу, цайми-цайми кIанттурдугу хIисавравун лавсун, дуруччин аьркиншиву лагма-ялттусса тIабиаьт.

Читайте также: