Даврил ялув бацIаву дувайсса центр

Мартрал 2-нний Каспийскалий шагьрулул администрациялул актовый залдануву хьунни «Процессирттал ялув бацIаву дувайсса центр» (ЦУП – Центр управления процессами) программалул презентация. Му программа сакин дурну дур Республикалул проектирдал офисрал пишакартурал.

Бадрижамал Аьлиева
БатIавривух гьуртту хьунни Каспийск шагьрулул администрациялул бакIчи МахIаммад Аьбдуллаев, ДР-лул ХIукуматрал председательнал цалчинма хъиривчу Рамазан Жяъпаров, республикалул министерстварттал ва ведомстварттал вакилтал.
Ва проект щаллу дурну дур лавай кIицI лавгсса офисрал жагьилсса зузалтрал: Имам Умалатовлул, Илияс Умалатовлул, Амир Султановлул.
Программалул каширдая бувсунни Имам Умалатовлул. Автоматизироват дурсса каялувшиндарал системалул кумаграйну бакIчинаща бюхъан тIий бур цуми бунугу хIукмурду, хьхьичI бивхьусса масъалартту щаллу хъанахъаврил ялув ацIан, анализ дуван. Мунил кумаграйну мукунма бюхълай бур, цумур-бухьурчагу, ведомствалул биялдаралу зузисса цайми структурардал даврил ялув бацIангу.
Мунал бусласимуних личI­лулну вичIигу дирхьуну, Рамазан Аьлиевлул кIицI лавгунни ЦУП хъанай душиву бунияласса программа, муний цанна дакI даркьушиву, му республикалул муниципалитетирттай зузи дуван цащава шаймур бувантIишиву.
МахIаммад Аьбдуллаевлул кIицI лавгунни му программа Каспийскаллал сакиншиндарал ва проектрал каялувшиндарал пишакартуралгу ххал дигьинтIишиву ччясса мутталий.