Байраннал хъирив хьусса байраннугу хIисавравун ларсун, уттигъанну МахIачкъалаллал ЦБС-рал 2-сса филиал-библиотекалий «Ниттил маз – ттул чаннацIуку» тIисса дагъус­ттаннал мазурдин хасъсса хъун дакъасса шадлугъ хьунни. Библиотекалий ччянияцIава шинмай тIивтIусса «Гьунар ва гьавас» тIисса клубрал гьанулий шикку чIа-чIаннин дувайссар укунсса журалул шадлугъ-батIавуртту.

З. АьбдурахIманова
Ванивух гьуртту хьун бувкIун бия ДГПУ-лул Дагъусттаннал миллатирттал литературалул кафедралул доцент М. Х. ХIажиахIмадова, Дагъусттаннал филологиялул факультет­рал студентътуращал ва библиотекалул чIаравсса шагьрулул №37 школа-гимназиялий ла­кку мазрал дарсру дихьлахьисса У. С. Парамазова цила дуклаки оьрчIащал.
Шадлугъ библиотекалул зузалтрал дайдирхьуна «Ниттил маз» тIисса Дагъусттаннал халкьуннал шаэр Ю. Хаппалаевлул назмулийну. Хъирив шадлугърал сакиншинна дурсса ва библиотекалул хъунмур, цуппагу жула лакку инсан, 1-мур ЦIувкIратусса Фарида Рамазановал бувсуна февральданул 21-нний дунияллий кIицI лагайсса Ниттил мазурдил кьинилул хъун бакъасса тарихрая.
Жула дагъусттан мазурдил буллугъшиврия, миллатир­ттал дакI­нихсса творчествалул чIюлу­шив­рия, Дагъусттаннал миллатирттал литературалул аваданшиврия бувсуна мукунма РАН ДНЦ-лул ИЯИЛ-лул элмийсса зузала, филологиялул элмурдал доктор Зулайхат Маллаевал, миллатирттал литературалул кафедралул доцент Маржанат ХIажиахIмадовал, ниттил мазурдил учитель Умамат Парамазовал.
Библиотекалул зузалт Сиясат Мусаевал ва Раиса ХIусмановал оьрчIан дуруна хъинну хIазсса «КIулсса къакIулт: аьжаивсса, чил мазурдивасса махъру» тIисса викторина. Мукунна дуруна мазурдиясса афоризмарду, учалартту ва лувлякъурду бусласисса ­«Аьщуйн щун бувсса махъру» тIисса выставка-викторинагу. Вайннал мукунна цала хIарачатрацIух сакин дурну дия «Маз – миллатрал дакIри» тIисса мазру пасихI баврия бувсъсса луттирдал выставкагу.
Шадлугърайн бувкIсса чIава хъамаллуралгу ниттил мазурдий­сса шеърирду ва цала ляхъан дур­сса, мазурдин хас дурсса чичрурду дурккуна. Гьарца назму дур­ккутари, вичIилийми оьрчIахь библиотекалул зузалтрал тавакъю буллай бия Дагъусттаннал цумур мазрайсса назму дурккуссарив бусан. Укун хIазну ва тяхъану ларгуна 2-сса библиотекалул зузалтрал сакин дурсса оьрчIащалсса ва студентътуращал­сса хьунабакьаву.