Гьашинусса цIусса дуккаврил шинайн ЧIяйннал дянивмур даражалул школа хъинну ххуйну хIадур хьуну бия. Школалий ремонт гьашину дунни учительтурал ва дуклаки оьрчIал хIарачатрацIух.

Цуппа директор Ирина Шамиловная тIайла хьуну, школалул щала коллектив хIулухIлай, сирду буклай булувкьуну бия гъин­ттул. Мукунма Ирина Шамиловна хIарачатрай бур школалучIасса багърая хайр ласлан. ХьхьичIва багъраву къур, нувщи, калан, ла­ччи, гьарзад дугьай­ссия, ми дарххуну, школалун аьркинмур ласай­ссия. Дуклаки оьрчIангу захIмат бишин лахьхьин багъ зузи бан дакIний бур.
Мукунна школалучIасса ясли-садрайгу диялсса дахханашивуртту хьунни. Гьашину хъунмасса хIаллай лавкьуну бивкIсса мюрщи оьрчIал группа цIунил тIивтIунни. Му агьамшиву дусса шадлугъ хьунни сентябрьданул 14-нний. Шадлугърайн оьвкуну, бувкIун бия ДР-лул Халкьуннал Мажлисравун увчIлачIисса депутат Расулов Аьбдул Батталлул арс, райондалул УО-рал хъунмур ХIаммакуева Альбина, райондалул администрациялул каялувчинал хъиривчутал Чаринов МахIаммад ва Илиясова Сабрина, ЧIяйннал шяраваллил юзбаши МахIаммадов Ися ва досуграл центрданул зузалт.
Зюннав-дачIу, ччергъилу рирщуну, балайрду тIий, къавтIий, мюрщултрал, миннал нитти-буттахъал ххаришиврул дазу-зума дакъая.
Шадлугърай ихтилатру бувна лавай кIицI лавгсса хIурмат лавайсса хъамаллурал. Цинявппагу барча буллай бия ва агьамшиву дусса байрандалущал, чIа тIий бия мюрщултран цIуллушиву, талихI, тирхханну.
ДакIнийхтунусса ва хъунмасса барчаллагь Аьбдул Батталовичлун, мунал цала чулуха ЧIяйннал ясли-садран дуллунни 45 азарда къуруш, мукунна ЧIяйннал жяматран щин дуцингу дуллунни 100 азарда къуруш. ЧIяйннал шяраваллил администрациялул каялувчи Ися МахIаммадович увкIун ия ва шадлугърайн дуцири игрушкардащал ва цаймигу ссайгъатирттащал. Хъунмасса барчаллагь вингу, жул ххаллилсса юзбаши. Шиккува учин, ЧIятусса жагьилсса фермер Аьбдуллаев Салманнул дуллунни ясли-садрал мюрщултран, бивххун, шанттан-бугълул ччан.
БавтIцириннал хьхьичI тарбиячи К-МахIаммадова Самиржигьаннул мюрщултращал ккаккан дунни концерт.
Шиккува бусан, ЧIяйннал ясли-садрайн бучIайссар мюрщулт, ЧIяту бакъассагу, Хъюяту, Ваччату. Цала оьрчIругу шарда куннасса къулайшивуртту дусса ужагърайн бавкьуну, ниттихъаща бюхълан тIий бур цала давур­ттайн буккан.
Цинявппагу байрандалия ххарину ппив хьуна! Яраппий, я ­Аллагь, цIуллушиву дулуннав ялун нани­сса никирахьхьун, чан къахьуннав мюрщултрал ххари­сса чIурду шяраваллава.
А. Аьбдуллаев,
ш. ЧIяйми