«Бивзрув, оьрчIрув! ЩябикIи», – вай мукъурттищал гьар кьини дайдишай цала оьрмурду школалущал бавхIусса пишакартурал касму. Сайки 30 шин хъанай дур Рамазанова Изажа МахIаммадовнал МахIачкъалаллал №37 школа-гимназиялий байбихьулул классирттахь дарсру дихьлай.

Залму АьбдурахIманова
Бувну бур Изажа ЦIуссалакрал райондалийсса ЦIуссалаккуй КIихIарчIиял шяравасса МахIам­мадлул ва КIамахъалиятусса Аминатлул кулпатраву. 1983 шинал ЦIуссалаккуй школагу къуртал бувну, дуклан пикри хьуну бур Дагъусттаннал педагогикалул институтраву. Миккугу тIайлабацIу къавхьуну, зун бувххун бур МахIачкъалаливсса СМУ «ГорРемтрестрайн». Дяхтта зий, хьхьувай подкурсирттайн занай, библиотекардаву луттирдах щябивкIун, хъиривмур шинал дуклан буххансса кьасттирай бивкIун бур. Шикку зий буна коммунист партиялувунгу бувххун бур. Ахиргу Изажа дуклан бувххун бур Тулалийсса педагогикалул училищалувун. Мугу ххуйсса кьиматирттащал къуртал бувну, МахIачкъалалив зана хьуну, дуклан бувххун бур бакIрайва цинма дуклан гъира бивкIсса Дагъусттаннал педагогикалул институтравусса филологиялул факультетрайн. Тулалия зана хьусса 1989 шинал бувкIун бур хIакьинусса кьинигу мюрщултрахь дарсру дихьлахьисса №37 школа-гимназиялийн. ЧIивиниява оьрчIру ххирашиврул ва миннахух дакI лагаврилгу Изажал оьрму бавхIуну бур школалущал. Школалий дуклай буна ванин цинма цуппа учительну, оьрчIащал зий-занай чIалай бивкIун бур. Гьашину цалчинмур классравун бувкIсса оьрчIругу хIисавну, ванил итабавкьуну бур урчIулчинсса выпуск. «Ттул даврил мурад – оьрчIан чичин-буккин лахьхьин баву бакъа, ххуйсса лайкьсса инсантал тарбия бавугур. Ттинин, вайксса шиннардий зий, ттула оьрчIая оьккисса, дакIнийн кьутIинсса бавну бакъара. Му дур ттул дакIнивусса ххаришивугу, ттула даврил ахир-къирагъгу», – тIий бур Изажа МахIаммадовна.
ЦIана школардан, учительтуран, дуклаки оьрчIан къабигьасса чIунну дур. Ци захIмат-жапашиву дунугу, цала касмулийн хаин къавхьуну, хъунмур чIун оьрчIан хас дурсса учительтурал бусрав-сийгу лагьсса дакъар. Ххуйсса учительнал цIа дургьуну, букIлай бур нину-ппу цумур-цагу школалийн. Мукун бусрав-сий лахъсса, за кIулсса, оьрчIан ду­ккаврих гъира бутанну зузисса учительнан хIисавну бур цила школалий ва лагма-ялтту кIулминначIа Изажа МахIаммадовнагу. ХIа­кьину хIукуматрал чулуха тIалав­шиннарду гьарза хьуну, ссуссукьушиву ххи хьунугу, ттун мудангу кIулссия учительнал пиша ца яла захIматсса ва жаваблувсса пиша бушиву.
Изажа МахIаммадовнал дахьва классраву, партардах щябикIан лахьлахьисса мюрщултрахь хIисаврттал дарс дихьлай ххал хьу­сса на хъиннува мукIру хьура учительнал пиша язи бувгьума хъинну ссавур дусса инсангу икIан аьркиншиврий.
Вай гьантрай щалва билаятрай кIицI ларгсса Учительнал кьинилущал барча буллай, чIа учин ччай бур Изажа МахIаммадовнан ва ва зузисса МахIачкъалаллал №37 школа-гимназиялул учительтурал щалва коллективран цIуллушиву, оьрчIащал зунсса гъира-шавкь, тIайлабацIу ва ссавур!