Итни кьини Дагъусттаннал Журналистурал союзрал къатрал хьхьичI дия ляличIиссара уттарашин: хIаят чIюлу дурну дия жагьи-жугьултрал, хъуни колонкарду дирхьуну, лахъну баллай бия музыкалул, балайрдал чIурду.
Ва дия «Молодежь Дагестана» кказитрал 95 шинан хас дурсса жагьилтурал флешмоб. Мунивух гьуртту хьунни республикалул вузирдал студентътал ва хъун шагьрулул школарттал дуклаки оьрчIру. Мукунма «Молодежь Дагестана» кказитрал коллектив ва махъсса журналистал.
Шадлугъ дачин дурну ия республикалий ва мунил кьатIув цIа ларгсса Азим Давидов – личIи-личIисса шадлугъирттал ведущий ва хъатIал тямада.
Шадлугъ дайдирхьунни цIа дурксса спортсментурал (Меджид Бектемиров, Рашид Юсупов, Арслан Бектемиров) каялувшиндаралу дурсса зарядкалийну. Флешмоб цала балайрдайну чIюлу дунни Руслан ХIасановлул, Гульдаста Мурадовал, Жаклинал.
Ва даву «Молодежь Дагестана» кказитрал дуллай бур жагьилтураву цIуллу-цIакьсса оьрму, спорт машгьур баву мурадрай.
Бадрижамал Аьлиева
