Августрал 29-нний Дагъусттаннал БакIчи Рамазан АьбдуллатIипов ва АьФ-лул ПаччахIлугърал Думалул Председательнал хъиривчу Сергей Неверов бувкIунни ЦIунтIиял райондалийса Мокок тIисса шяравун. Тикку ми хьунабавкьунни хьхьичIмур нюжмардий цIу дагьну къатри ччувччусса кулпатирттащал.
«Зу зулва ялун бивсса баларащал зувалу къаличIлачIиссару, зуйн кьини дуркшиврия кIулссар федерал даражалийгу. Аьрасатнал ХIукуматрал Председатель Дмитрий Медведевлул бакIрайн лавсунни аьркинссаксса арцу лякъин. Республикалул МЧС-рал дузал бунни инсантал чIумуйсса паракьат бувансса кIанттурду (городок). Мува куццуй анаварну щаллу бантIиссар компенсациярду ва цаймигу арцурду ласунсса документру, мунил буруккин зу мабару», — увкунни Рамазан АьбдуллатIиповлул.
Дагъусттаннал МЧС-рал бакIчи Нариман КъазимахIаммадовлул бувсунни инсантал чIумуйсса паракьат бувсса кIанттурдай дукралул щаллу буллай бушиву, духтуртурал аьркинминнан кумаг буллай бушиву, тIайла дацIан дуллай бушиву зараллу бивминнал сияхI.
Тиккува бувсунни зарал бивминнан цалчинсса кумагрансса арцурду дуллушиву.
ХIукму хьуну бур билаятрал даражалийгу, республикалул даражалийгу кIа шяраву цIусса къатри дуван, цIубуккан бантIиссар школа ва оьрчIал сад.
