Августрал 26-ний Дагъусттаннайн даврил аьрххилий увкIунни АьФ-лул связьрал ва массовый коммуникациярттал министр Николай Никифоров.
Аэропортрай федерал каялувчи хьунаавкьунни региондалул каялувчи Рамазан АьбдуллатIиповлул.
МахIачкъалалив увкIукун Николай Никифоровлул ихтилат бунни журналистътуращал.
Дагъусттаннай вай гьантрай хьусса интернет-форумрая ихтилат буллай, Николай Никифоровлул укун увкунни: «РИФ. Кавказ» — му ца яла агьаммур мероприятияр цифровой экономикалун, интернетрал лябуккулун, Аьрасатнаву ттизаманнул технологиярттан хас дурсса. Жун агьамшиву дуссар РИФ Аьрасатнал форум шаврил, муничIан кIункIу тIий буну тIий чIявусса экспертътал ва му хъанай буну тIий Москавлив бакъасса, цайми кIанттурдайгу.
Рамазан АьбдуллатIиповлул мукъурттийн бувну, Дагъусттаннай 3 шинал мутталий сайки щаллуну бартларгун дур проектрал управление. ХIакьину му управление диян дан аьркинссар ттизаманнул технологиярттал даражалийн. Ганал пикрилий, республикалийсса личIи-личIийсса приоритетсса проектирдал гьурттучитурал дянивсса дахIаву цахъисгу мобилсса дикIан аьркинссар. Му ишираву Аьрасатнал связьрал ва массовый коммуникациярдал министрнал кумагран кьимат бищун къашайссар.
Рамазан АьбдуллатIиповлул мукъурттийн бувну, интернет-форум хъанахъиссар дукаврин ххуйсса площадкану. «Жу икьрал дарду, Николай Никифоровлул Дагъусттаннайн тIайла буккантIиссар личIи-личIисса проектирдан ттизаманнул технологиялул управление дузал дуллансса пишакартал. Жу миннах мюхтажну буру», — увкунни Дагъусттаннал БакIчинал.
