31-ми Олимпиадалул тIуркIурдаву ххув хьусса лачIунукку Аьбдурашид Сяъдуллаев бусравну хьунаавкьунни МахIачкъалалив августрал 26-нний.

Чемпион самолетрачIа хьу­на­­авкьунни Да­гъус­ттаннал БакIчи Рамазан Аьбду­ллатIиповлул. Ганал Сяъдуллаевлухь барчаллагь увкунни, республикалийн бюхттулсса награда ларсун учIаврихлу.
«Ттун хъинну тIааьн бивзунни нава хьунаакьин жула республикалул хъунама учIаву, на мунахь барчаллагь тIутIиссара республикалий спортрах къулагъас дуллалаврихлу», — увкунни чемпионнал.
Аэропортрая олимпий чемпионнащалсса машинарттал кьюкьа дуркIунни МахIачкъалалив. Лениннул цIанийсса майданнив га хьунаакьин бувкIун бия шагьрулийсса спортрал организациярттал каялувчитал, министерстварттал ва ведомстварттал вакилтал, студентътал ва чIявусса цаймигу инсантал.
Рамазан АьбдуллатIипов Олимпий тIуркIурдал чемпионнащал цачIу майдандалул лагма бувккунни хIурматрал круг хIисаврай. Яла шадлугърал мероприятие дайдирхьунни «Лезгинкалул» къавтIаврийну.
Шадлугърал мероприятие тIитIлай, региондалул каялувчинал уттигу цал аьла-ссалам бунни спортсменнахь циняв дагъусттанлувтурал цIанияту.
«Аьбдурашидлул ххувшаву так ца ганал хьхьичIуннайшиву дакъарча, га дур щалва Да­гъусттаннал ва Аьрасатнал хьхьи­чIуннайшиву. Аьрасатлувтурал хьхьичI медаллачIансса ххуллий цуксса чIярусса дайгьузанну диркIнугу, жулва спортсментал лайкьну бувккунни Олимпиадалул тIуркIурдаву ва тасттикь бунни Аьрасат – бюхттулсса паччахIлугъ душиву. ЛяличIину дакI ххари дуллай дур Аьрасатнал цIа бюхттул дурми спортсментуравух дагъусттанлувталгу бушаврил. Жула ватанлув Аь. Сяъдуллаевлул хIарачат личIину кIицI бунни билаятрал Президентнал ганан Дусшиврул орден дуллалисса чIумал», — увкунни Рамазан АьбдуллатIиповлул.
Тамашачитурал хьхьичI ихтилат буллай, Аьбдурашид Сяъдуллаевлул барчаллагь увкунни ва куццуйсса шадлугърал тагьардануву хьунаакьаврихлу. Ихтилатру къуртал хьувкун «Лезгинкалул» къавтIавуртту дунни, МухIсим Камаловлул ва Тагьир Курачевлул балайрду увкунни.