2016 шинал Дагъусттаннал багъманчитурал ларсун дур 1 млн. ва 200 азарда тонна ахънилссаннул, ахъулссаннул ва бахчалул. Мунил хIакъираву бувсунни ДР-лул Шяраваллил хозяйствалул министерствалий.
ХIакьинусса кьининин дартIун дур сайки 732 азарда тонна ахънилссаннул 21 азарда гектардания, 1 гектардания 341 центнер хIисавну.
ЦIанасса ппурттуву батIлай бур нувщигу, уттинин бавтIсса нувщул бакIлахъия хьуну дур 156 азарда тонна, ца гектардания ларсун дур 200 центнер. Нувщи бавтIун бур 7 азаллий 700 гектардания. Гьашину пландалий бур датIин 380 азарда тонна нувщул.
ЧIявусса батIин най бур калан, помидор, кьая, чимус ва нисварти. ЧIал бакъа Дагъусттаннал базардаву бахлантIиссар кIанттул бадиржан. Гьашину пландалий бур датIин 1 млн. ва 500 азарда тонна личIи-личIисса ахънилссаннул.
Министерствалий бувсъсса куццуй, цIанасса ппурттуву республикалул багъманчитурал дартIун дур 70 азарда тонналияр ххишаласса ахънилсса 8 азарда гектардания. Пландалий бур гьашину ласун 110 азаллийсса тоннарду ахъулссаннул.
Гьашину дартIун дур 165 тонна бахчалул ххяххиярттал 6 азарда гектардания.
ДукIу Дагъусттаннал шяраваллил хозяйствалуха зузиминнал дартIун диркIссар 1 млн. ва 300 азарда тонна ахънилссаннул, 380 азарда тонналия ххишаласса нувщи ва 128 азарда тонна ахъулссаннул.
