Дагъусттаннал шяраваллаву кIинтнийнсса лазуни хIадур дуллай бур. ЦIанасса ппурттуву хIадур дурну дур 1 млн. ва 124 азарда тонна хъаласса лазундарал. Мунил хIакъираву бувсунни ДР-лул Шяраваллил хозяйствалул министерствалул ххяххиярттал управлениялул зузалал. Ми хъанахъиссар дукIу вара чIумал хIадур дурминнуяр 7 азарда тонна ххишаласса.

ХIакьинусса кьининин республикалул циняв хозяйстварттаву хIадур дурну дур 1 млн. ва 122 азарда тонна ххалал, 28 азарда тонна сенажрал, 88 тонна нухьхьал. Миннуяр ххишала республикалул хIадур дурну дур 4 азаллий 100 тонна щинтасса лазундаралгу. Лазундарал луртан хIадур дурну къуртал хьунтIиссар ссутнил ахирданийннин.
ДукIу республикалул хъузалтрал хIадур дурну диркIссар 1 млн. ва 478 азарда тонна лазундарал, миннувату 1 млн. ва 345 азарда тонна ххалал, 38 азаллий 404 тонна сенажрал.
Гьашину лазуни хIадур давриву хьхьичIунми кIанттурдай дур Къизлардал район (128 азарда тонналияр ххишаласса), Хасавюртуллал район (126 азарда тонналияр ххишаласса), Тарумовкаллал район (74 азарда тонна), Бабаюртуллал район (88 азарда тонналияр лирчусса).
Республикалий мукунма интту лачIал хIаллил лакьлай бур. ХIакьинусса кьининин республикалул хъузалтрал ларсун дур 28 тонна къалмул 12 азарда гектардания, ца гектардания дянивну ларсун 23 центнер къалмул.