Сентябрьданул 13-нний Поэзиялул театрдануву «Ккалайру лахъну» тIисса проектрал хахливусса кIилчинсса шадлугъ хьунни. Цалчинсса укунсса журалул шадлугъ хьуну диркIссар майрай, оьруснал чичрулул ва Культуралул кьинилул хьунийн. Микку тамашачитурал хьхьичI бувккуну, ххалбивгьуссар «Слово о полку Игореве» цIанилусса оьруснал фольклорданувасса хавар .
З.АьбдурахIманова
Уттимур шадлугърай Дагъусттаннал миллатирттал Цашиврул кьинилул хьунийн хIукму хьуну бивкIссар, 2011 шиная шиннай кIицI дувайсса ва байрандалул гьану бивзсса, миллатирттал вирттаврал балайрду ва назмурду дуккин.
Шикку вай балайрдая, литературалул произведенияртту хIисаврай, гьарта-гьарзану бувсунни филологиялул элмулул доктор Разият АхIмадовал. Балайрдавусса тарихрал иширттая бувсунни тарихрал элмулул доктортал Эльмира ТIалхIатлул ва Руслан Сафарбаговлул.
Шеърилугърал театрданул хъунаманал хъиривчу Ариза Батировал бувсунни, ва байрандалул хьунийн Дагъусттаннал миллатирттал вирттаврал балайрду буккин цан дакIнийн бувтшиву таатрданул дус, филологиялул элмурдал кандидат Муса ХIажиевлул.
-1998 шинал школалий зузисса ппурттуву на уссияв нава дарс дихьлахьисса 9-мур классраву «Слово о полку Игореве» произведение лахьхьин бан хIадур хъанай. Хъинну буруккинттарайгу уссияв, цукунни Дагъусттаннал оьрчIащал ва къабигьасса произведениялия гъалгъа тIун, тIий. На му ттула пикрилия ттула учитель Самсон Бройтманнухь бувсукун, мунал ташвишгу къавхьуну куна, «Надир-шагьнащалсса талатаврия» буслай айихьу , куну. Мяйжаннугу, ми кIивагу произведениялуву ттун ляркъуна цара ца лащанбавуртту, цара ца образру, лишанну, рухI-ссихI. КIирагу культуралул цаннил ца щаллу даврий махIаттал хьуну уссияв,-бувсунни ванал.
Шадлугърай мукунма яру мазрай «Надир-шагьнащалсса талатаву» тIисса произведениялувасса бутIа бувккунни театрданул художествалул каялувчи, Дагъусттаннал халкьуннал шаэр МахIаммад АхIмадовлул. Хъирив бувккунни оьрус мазрайн В.Державиннул ва С.Липкиннул таржума бувсса лакрал «Хан Муртазааьли» ва яруссаннал «Надир-шагьнащалсса талатаву» балайрдавасса бутIригу. Вай ккалай бия художниктал, театрдал артистал, вузирдал преподавательтал ва студентътал.
Ва хьхьуну шеърилугъ ххирасса, шиккун бавтIсса тамашачитурал дяниву миллатирттал цашиврул Кьинилун хасну, вирттаврал балайрду ккалаккаву шеърилугърал театрданул аьдатрайн кIура даен дансса маслихIат хьунни.
