Вай махъсса гьантрай гьарица инсаннал зума-ккар­ччулусса, Аьрасатнал телевидениялул цинярдагу каналлая бусласисса хавар бия Дагъусттаннал полицейский МахIаммад НурбахIандовлул къучагъшивриясса хавар.

Андриана Аьбдуллаева
Оьрмулул ва бивкIулул ххуттай МахIаммадлул увкусса «Зузияра, уссур­вал» тIисса коллега­хъахь аманатрайсса махъва-махъсса махъру ца лахIзалий щалагу дунияллийх ппив хьунни. Полицейский аьщун излазисса ролик ххал дуллай, махIаттал хъанай бура ва илтIа-кIюласса жагьилнал кьянкьашиврий, чувшиврий. Душмантурал, къачагътурал хьхьичI кьянкьану бавцIуну, вирттаврал кунна жанну дуллу­сса полициялул зузалт­рал лахъи­сса сияхIраву уттигу ца виричунал цIа ххи хьунни. Пахругу, кьурчIисса асардугу… Уттигу ца ниттил лякьа шюршунни, уттигу ца жагьилсса хъамитайпа щащар хьунни, уттигу цаппара оьрчIру ятинтал хьунни. Щак бакъар, къучагъсса полицейскийл аманат би­ттур буллай, МахIаммадлул коллега­хъал дакI марцIну цала къуллугърал бурж биттур булланшиврий. «Зунну, уссу!» тIий, баян буллай бур ми МахIаммадлун жавабран.
ДакIнинийн бутанну хьумур. Избербаш шагьрулий спецоперация буллалисса органнал зузалтран ивкIусса къачагънал телефондалуву ляркъуну дур Сергокъалаллал шяраваллил чIаравсса вацIлуву кIия адимина аьщун бизлазисса видеозапись. Ва иш хьуну бур 2016 шинал июль зурул 10-нний. Аьщун бивзминнавасса ца ур полициялул хIаписар МахIаммад НурбахIандов.
Телефондалийсса видеозаписьрава чIалай бур полициялул зузалал къучагъну жан дуллушиву. Ярагъуннищалсса къачагъ, пистолетгу бурган бувну, МахIаммад НурбахIандовлухь ур вила уссурваврахь ва дустурахь органнава лихъияра уча тIий. Къачагътурал, цала тIутIимур къабарча цува оьрмулуцIа антIишиву кIулну бунува, къучагъсса полицейский, камералувунгу урувгун: «Зузияра, уссур­вал» — тIий ур. Цанма ччимур къабувкун, къачагънал му бивтун утлай ур.
Га кьини МахIаммад НурбахIан­дов 13 ва 19 шинавусса цала уссур­вавращал ва ссурахъу Аьвдурашидлущал игьалаган шяраваллил чIаравсса вацIлувун бувкIун бивкIун бур. Микку биривну бур ми къачагътурахьхьун. МахIаммадлул мачча-гъанминнал бусласимунийн бувну, къачагътал 19 шинавусса Арсен нигьал ан кьаст лахIлай, мунахун бахчилай бивкIун бур. Ссурахъийхлу увксса Аьвдурашид къачагътурал бивтун увтун ур. Арсеннул ва МахIаммадлул кару-ччанну дархIуну дур. МахIаммад полициялул зузала ушиву кIул шайхту, мунахь цала уссурваврахь, дустурахь полициялул органнава насияра уча тIун бивкIун бур.
«Зузияра, уссурвал!» тIисса жаваб баяйхту, къачагътурал МахIаммад бивтун увтун ур.
«Избербашская» тIисса къа­чагътурал кьюкьлуй каялувшиву дуллай ивкIун ур МахIаммад Халимбеков. Му хIала ивкIун ур му­ххал ххуллу пIякь учин бан кьаст лархIуминнавух, Сергокъалаллал жямат аьщун бивзминнавух. Му кьюкьлул члентал бат бувну бур сентябрь зурул 7-нний. Сентябрь зурул 13-нний соцсетирдай дур­ккун дур НурбахIандов аьщун изав­рил бара хьусса ца къачагънахь цIухху-бусу буллалисса видео. Мунал лавсун бивкIун бур камералийн НурбахIандов аьщун излазисса куц. 23-25 шинавусса Артур Бекболатов нач-хIая дакъа, хъисвагу хIайп къатIий буслай ур цала полицейскийгу, мунал уссурвалгу бувгьу­сса куц: «Ца шанай ия кьатIув. Вайми палаткалуву. Буккан бувну мива кару дахIарду. Хъанахъимур гьарзат на камералийн ласлай уссияв. Халимбековлул НурбахIандовлул бакIрайн бивтунни».
ЧIивима лейтенант МахIаммад НурбахIандовлул дунияллийх машгьур хьусса «Работайте, братья» тIисса махъва-махъсса мукъурттищалсса ролик ккарккун махъ, активистурал петиция чивчуну бур мунан Аьрасатнал виричунал цIа дулара тIисса.
Instagrаm чатравусса цала лажиндарай Дагъусттаннал БакIчи Рамазан АьбдуллатIипов чичлай ур, цувагу Аьрасатнал Президентнахь НурбахIандовлун Аьрасатнал Виричунал цIа дулара тIий хъирив излай ушиву.
— МахIаммад НурбахIандовлул, цала къуллугърайн хаин къавхьуну, икIайкунсса хIаписарнал кунна, къучагъшиврий жан дуллуссар, ва абадлий кьянкьашиврул ва Ватан ххирашиврул эбратну личIантIиссар. Ванал къучагъшиврул цал ттигу чIалачIи був­ссар къачагътураща жува нигьал бан къахьунтIишиву, жува миннаяр кьянкьашиву, цIакьшиву. МахIаммад кунмасса инсантурал хIарачатрайнур хIакьину жущава жула республикалий паракьатну оьр­му бутлан бюхълахъисса Щалагу Дагъусттаннал агьулданул цIанияту барчаллагь тIий ура хIакьсса пат­риот тарбия увсса МахIаммад НурбахIандовлул нитти-буттахь, коллегахъахь. Ванал цIа абадлий дакIний дикIантIиссар! – тIий, чичлай ур Республикалул БакIчи Рамазан АьбдуллатIипов.
МахIаммад НурбахIандовлул цIа ца лахIзалий бусалдаравун дагьунни. Нажагьсса бухьун­ссар хIакьину ванал къучагъшиврия къабавсса. Билаятрал гьарицагу мурцIния личIи-личIисса шагьрурдая, билаятирттая чичлай бур пашмансса ва пахрулул бувцIусса ххару, чичлай бур, ччарча нитти-буттащал кьурчIишиву кIидачIлай, ччарча полициялул зузалан къучагъшиврун лайкьсса награда дулун аьркин­ссар тIий.
Ингушетиянал БакIчи, нукIува­сса кадровый военный Юнус-Бек Евкуров укун чичлай ур:
«Ккарккунни интернетраву Дагъусттаннал полицейский МахIаммад НурбахIандовлуясса ролик. Най унува чIалай ур кьянкьа-кьурчIисса жагьил ушиву. Цува къаитантIишиву, ивчIантIишиву кIулну бунува, нигьа къаувсун «Зузияра уссурвал!» тIий аманат буллай ур коллегахъайн МахIаммад НурбахIандов. Ва хъуннасса Виричушивур. Ванал Виричушиврул террористуран хъуннасса сси-къащи дурссар. Ва жагьилнал цала мундирданий ттангъа хьун къаавцIуну, къучагъшиврий жан дуллуссар. Укунми эбратну хьун аьркинссар полициялуву, органнаву зузисса цинявннан. Ккавкказнаву укунсса виртталли аьркинсса».
— БивкIулийн лажинну авцIуну, ва жагьил махъаллил къавхьунни цала идеаллая, къабювхъунни террористураща ва цала коллега­хъахь органнава насияра учин ан. Ванал жан дуллунни цала къуллугърайн хаин къавхьуну. На мукIрура спецназравугу, полициялувугу, цайми гужирдал ведомстварттавугу укунсса жагьилтал зий бушиврий. Жува ххув хьунтIиссару. Душманнан ххуллу кьукьинтIиссар! – тIий ур «Россия-24» телеканалданий­сса интервьюраву «Альфа» подразделениялул ветерантурал Дунияллул ассоциациялул вице-президент Алексей Филатов.
Дагъусттаннал полицейскийл виричушиврия бавну бур дазул кьатIувсса хIукуматирттайгу. Европанал яла хъуними изданиярттава­сса ца – Daily Mail тIисса ингилис кказитрай рирщуну дур дагъусттанчунан хас дурсса макьала. Шикку дур макьала дурккусса ингилиснал комментариярттугу.
— РухI хъинний дишиннав вил, къучагъсса ихтиярду дуруччуй!
— Дагъусттаннал полицейскийнал дакIнийн увтунни ттун укуна къучагъсса оьрус, ИГ-рал ((Верховный судрал ХIукмулийну Аьрасатнаву къадагъа дирхьусса террористурал группа) бакIкьукьултрал цала лагма дургьусса чIумал, авиациялул цIу цайнна ларсъсса.
— Ттун буниялагу ххуй бизлай бур аьрасатнал агьлу. Ярагъуннил къярзгу бацIан бувну, миннащал дустал хьурча къахъинав жунма. Минная жунма ххишала бакъа ххуйсса союзниктал хьунссия аьмсса душманнайн данди бацIан.
Укун тIий, чичлай бур Англиянал агьлу.
ДР-лул Жагьилтурал ишир­ттал­сса буллалисса министерстволул тавакъю бувну бур Серго­къа­лаллал райондалул каялувчитурахь МахIаммад ва Аьвдурашид НурбахIандовхъал аьпалун райондалул цания ца школалий аьпа­лул ула дишин ва шяраваллил кIичIираваллан миннал цIарду дизан. Соцсетирттаву бур Дагъусттаннал МВД-лул къатрайн тIайлану «Зий буру, уссу» тIий чивчусса гьайкал дацIан дарча хъина тIий.
Ва макьала чирчуну махъ бавунни Аьрасатнал Президент Владимир Путиннул ХIукмулийну къуллугърал бурж биттур буллай къучагъшиврий жан дуллусса полициялул лейтенант НурбахIандов МахIаммад НурбахIандлул арснан Аьрасатнал Виричунал цIа дуллушиву.