Сентябрьданул байбихьулий МахIачкъалаллал №37 школа-гимназиялул учительтуран ва дуклаки оьрчIан хьунни хъинну дакIний личIансса ва ххарисса иш. Шикку тIивтIунни школалул цIусса корпус.

Залму АьбдурахIманова
Цуппа ва школа тIивтIуссар 1964 шинал ва ккаллину буссар жула хъуншагьрулий ца яла бусрав­сса дуккаврил идаралун. Школалул цIусса къатри тIитIлатIисса сентябрьданул 1-сса кьини ва агьам­сса иширащал шикку зузисса учительтурал коллективгу, дуклаки оьрчIругу барча бан увкIун ия ДР-лул Халкьуннал Мажлисрал председатель Хизри Шихсаидов ва Аьрасатнал Думалул депутат ХIажимет Сапараьлиев. Школа тIитIаврицIун вайннал мукунма барча бувунни «Российское движение школьников» тIисса щалва билаятрал сакиншиндаравун кьамул бувсса республикалул школарттал дуклаки оьрчIругу. Шиккува дакIнийн бутан, ва сакиншинна щурущи дуваврищал жулла республикалия цалчин мунивун бувхссар МахIачкъалаллал № 37 школа-гимназиялул дуклаки оьрчIру. Сакиншиндаравун бувхсса школарттал директортуран ялув кIицI бувсса хъамаллурал пишкашгу дурунни «Российское движение школьников» тIисса лицензияртту.
Шадлугърая махъ, ятIул лентагу кьувкьуну, школа-гимназиялул директор Индира Мирзаевал хъамаллуран ккаккан бувунни уттизаманнул къулайшиннардил лащу-щаллусса идара. ХIукуматрал чулухасса вакилтал тIайла бувккун махъ Жагьилтурал иширттаха зузисса министерствалул жагьилсса пишакартурал оьрчIахь дирхьунни дакьаврия ва ххуй-хъиншиврия бусласисса дарсру. Мукунна дурунни РДШ-лул сакиншиндарая бусласисса презентациягу. Шадлугърал хъунмур аваза къуртал хьусса ппурттуву, хIалу дирирну дуна, нагу хъун бакъасса ихтилат бував школа-гимназиялул директорну ацIунниха лирчусса шиннардий зузисса, Читтурдал шяраватусса Нураттиннул душ Мирзаева Индиращал. Жула лакраву чIявучин кIулссар ванил буттал цIа, Гъумучиял школалий зий ивкIсса ххаллилсса учитель хIисаврай.
Ва бур «Отличник просвещения» ва ДР-лул лайкь хьусса учитель.
— Индира Нураттинов­най, цими дуклаки оьрчIан­сса, цукунсса шар­тIир­дащал дузал школа бур ва? ЦIусса корпус тIитIаврищал цуку-цукунсса масъалартту дузал хьунтIиссар?
— Мяйжаннугу, школалул оьрмулуву хьусса ва цIушинна жу ккалли дуллалиссару хъуннасса ххаришиврун. Корпус бур 300 дуклаки оьрчIансса, хъунисса, чаннасса ва гьарта-гьарзасса кабинетру бусса. Тиву дуклантIиссар жул байбихьулул классирттал оьрчIру. Ва бухмур корпусраву кабинетру биял къахъанай, ттинин школа зий бу­ссия шанна сменалий. Ва бия жул ца яла цIюрувкьумур буруккин. Шанна сменалий зузисса школа бухьукун, чIявуми нитти-буттан му зат къулай къабизлай, ххуй­сса, хIарачат бусса оьрчIру жучIату лавгсса ишругу шайва. Ча, утти ва буруккин яла лавгссар. Тиву бур оьрчIал дукра дукансса гьартасса столовая, продукция ядуван бюхъантIисса холодильникру ва цаймигу оборудование дусса цивппа-цивппалусса къатри.
Мероприятирттайн хIадур хьун бикIу, укунма къабувчIумур ялунгу цIакь бан, тикрал бан бикIу, лап захIматну бикIайва, учительтуран кабинетру биял къахъанай. Утти ва буруккин яла лавгун махъ жу щирикIин дувантIиссар гьарцагу оьрчIащал дуван аьркинсса индивидуальныйсса даву. Укунсса даврия мюнпат бикIантIиссар жагьилсса учительтурангу, аьмну школалунгу.
Мукунна утти цила низамрай бюхъантIиссар ритмикалул дар­сру дишингу. Бур ххуйсса оборудованиялул щаллусса информатикалул, ингилис маз дихьлансса кабинетругу. Жуща утти бюхъантIиссар личIи-личIисса кружокру дачин дуван.
— Яла ларгсса шин зун цукунсса хьур? Ци хIаси­ллащал ва ци мурадирттащал дайдишарду цIумур дуккаврил шин?
— Гьарцагу дуккаврил шин жул школалун лагайссар ххуйсса, цIа дансса ккаккиярттащал. Гьар шинах медаллу ларсъсса 9-10 дуклаки оьрчI шайссар. Ларгмур дуккаврил шиналгу 10 оьрчIал ларсунни мусил ва арцул медаллу. Микссава дуклаки оьрчIал марцIсса ххювардай къуртал бунни 9 классгу. Школа гьуртту шайссар шагьрулий, республикалий дуллалисса цинярдагу олимпиадарттай, элмийсса батIавурттай ва жяматий­сса давурттавух. Ттула каялувшиврулусса коллективраягу ттул ду­ссар ца тIалавшинна: цала-цала буцири къайгъурдугу школалул кьатIув кьабивтун, бусса хIарачат бан оьрчIан зат лахьхьин бан, миннахсса къулагъас ххи дан. Учительнал пиша язи бувгьусса жу хIазран бакъар, жул мурад – оьр­мулул дайдихьу школалия хъанай духьукун, оьрчIан тIайласса ва чанна­сса кIулшивурттал ххуллу кка­ккан бавур.
ТIайлабацIу хьуннав жунма цинявннанмагу ва цIуллушиву дулуннав ялун дуркIсса дуккаврил шин ххуйсса ккаккиярттащал къуртал дувансса.