ДР-лул Шяраваллил хозяйствалул министерствалий бувсмунийн бувну, сентябрьданий багъманчитал байбивхьуну бур къюмайтIутIи батIлай.
ЦIанасса ппурттуву бавтIун бур 14 азарда тонналияр ххишаласса къюмайтIутIи. Республикалул хозяйствардал къюмайтIутIи бавтIун бур 1 азаллий 600 гектардания, ца гектардания 86 центнер хIисавну. БавтIсса циняв къюмайтIутIувату 5 азарда тонна тIайла дуркссар переработкалун, яни хIан, сок дуккан дуван, лирчIсса 9 азарда тонна машай дуккан дурссар.
Вай гьантрай чIявучIин батIлай бур къюмайтIутIул ччяни бияйсса сортру – «Августин», «Аркадия», «Ливия», «Юбилей Новочеркасска» ва цаймигу. ЦIанасса ппурттуву республикалул базардаву бахлай бур чIявуну «Августин» сорт. Республикалий 1 азаруннияр ххишаласса гектар аьрщарай бувгьуну бур ва журалул къюмайтIутIи.
ЦIанасса ппурттуву тIутIи батIлай бур Къизлардал, Къумторкъалаллал, Къарабудахккантуллал, Хайдакьуллал, Дарбантуллал МахIарамккантуллал, Сулайман Стальскаллал ва Къизилюртуллал районнал хозяйстварттаву. Махъра-махъсса ккаккиярттайн бувну, шяраваллил хозяйствалул предприятиярттаву лавсун бур 7 азарда тонналияр ххишаласса къюмайтIутIи, ца азарда тонналияр ххишаласса тIутIи лавсун бур КФХ-рдал, тIювардал хозяйствардал (ЛПХ) лавсун бур 6 азарда тоннаксса тIутIи.
ДукIу Дагъусттаннай лавсун бивкIссар 147 тонна къюмайтIутIул. Гьашину тIутIул багъманчитурал ният дур 156 азарда тонна тIутIул ласун.
ХIадур бувссар
ХIасан Аьдиловлул
