БувчIавуртту дайдишиннин чансса чIун лирчIун дур. ЧIурду булаврил цасса кьини, сентябрьданул 18-нний Дагъусттаннай бувчIлантIиссар депутатътал АьФ-лул ПаччахIлугърал Думалувун, ДР-лул Халкьуннал Мажлисравун, мукунма муниципал сакиншиннал представительсса органнавун. ЦIана най дур бучIавурттал хьхьичIсса агитация.

ХIасан Аьдилов
2016 шинал бувчIавурттал компанияртту информациялул щаллу дуллалаву мурадрай, агьали агитациялувух хIала-гьуртту баву мурадрай, сентябрьданул 6-нния 16-ннийнийн Дагъусттаннал шагьрурдайн ва районнайн занантIиссар «агитациялул десант» тIисса цIанилусса бригадартту. Мукунсса акция жулла республикалий цалчинни буллалисса, мунил мурад хъанахъиссар жяматирттал цалва гражданшиврул бурж биттур баву – чIурду булавривух хIала-гьуртту шаву. Мунил сиптачи хьуссар Дагъусттаннал БакIчи Рамазан АьбдуллатIипов.
«Наша партия – Дагестан» лозунгралусса акция хьуссар сентябрьданул 6-нний МахIачкъалалив Дусшиврул къатрачIа. «Десантравун» бухлай бур ДР-лул исполнительный властьрал органнал къуллугъчитал, ДР-лул БакIчинал вихшалалул инсантал, СМИ-рдал вакилтал, жяматийсса организациярттал ва интеллигенциялул вакилтал. Миннал цинявннал къулбасру дурссар «Жу – марцIсса, тIайласса бувчIавурттахлуру» тIисса меморандумрай.
ЦIуссалакрал райондалийн «агитациялул десант» гьантIиссар сентябрьданул 11-нний.
Райондалийн бувкIсса «десант» хьунабакьлантIиссар муниципал сакиншиндарал активращал, райондалул жяматрайн оьвчинтIиссар бувчIавурттан хасъсса митинграй гьуртту хьун, миннахь тавакъю бувантIиссар сентябрьданул 18-нний циняв бувчIавурттавух гьуртту хьуну, цалва чIурду булун лайкьсса кандидатнахлу.