Сентябрьданул 25-нний Ингушетиянаву Рашид Аушевлул цIанийсса стадиондалий хъуннасса шадлугърай тIиртIунни Ккавкказуллал хайлкьуннал культуралул ва спортрал VII-сса фестиваль. Му фестивальданул цIу лархъунни СКФО-лул 7 субъектрал вакилнал. Аьрасатнал Кьиблалул спортрал агьаммур мероприятиялул ттугъ лавсун най бия олимпий чемпионтал, бяст-ччаллу цивппарив байбивхьунни Ухссавнил Ккавкказуллал иширттал министр, фестивальданул оргкомитетрал каялувчи Лев Кузнецовлул.

Фестивальданул гьурттучитурахь, республикалийн бувкIсса хъамаллурахь ча бувкру тIисса махъ лахълай, Ингушетиянал БакIчи Юнус-Бек Евкуровлул кIицI лавгунни Ккавкказуллал халкьуннал культуралул ва спорт­рал фестивальданул кабакьу буллалишиву миллатрал культура, миллатирттал спортрал журарду буруччин, хьхьичIунмай буван, спорт жагьилтурал дянив машгьур буван.
— Жун хъуннасса агьамшиву дуссар Ингушетиянаву хIасул хьусса Ккавкказуллал тIуркIурду буллансса сипта, цил авторнугу жула олимпий чемпион Исраил Арсамаков усса, чIаххувсса цинявппагу регионнайгу итталун дагьаврил, мунил чIарав бацIаврил. Ряхра шинал дянив ва фестиваль хьунни билаятрал культуралул ва спортрал оьрмулувусса агьамсса ишну, — увкунни Юнус-Бек Евкуровлул.
Гихунмай Ингушетиянал БакIчинал кIицI лавгунни гуж­сса ва цIуллу-цIакьсса ник тарбия даву, физкультура ва спорт хьхьичIуннай даврил ххуллий­сса гьарцагу пикрилул чIарав бацIаву региондалул хьхьичIсса агьамми масъаларттавасса цану бушиву.
Фестиваль лява-личIийсса иширан ккалли дунни Лев Кузнецовлул, цилгу Ккавкказуллал халкьуннал спортрал ва культуралул язими аьдатирттал аваданшиву цачIун дурсса.
— Фестиваль даврил сипта ва аьрщарай лявхъуну бур, арулла шин ларгун махъ фестиваль цIунилгу ватандалийн зана хьунни, — увкунни ванал.
Аьрасатнал Президентнал СКФО-райсса вакил Олег Белавенцевлул чулухасса барча буллалисса махъру бувккунни мунал хъиривчу Андрей Шишкиннул.
Гихунмай махъру лавхъунни Чачаннал Республикалул БакIчи Рамзан Кьадировлул, Ставрополлал крайрал губернатор Владимир Владимировлул, Москавуллал физический культуралул ва спортрал департаментрал каялувчи Алексей Воробьевлул ва цайминналгу.
Фестиваль тIитIлатIисса шадлугърай цалва язими номерду ккаккан бунни Ухссавнил Ккавкказуллал къавтIаврил цIанихсса коллективрттал: Чачаннавасса «Вайнах», Ставрополлал крайраясса «Ставрополье», Дагъусттаннаясса «Лезгинка», Ингушетиянавасса «Ингушетия» ва мукунна цаймигу.
Культуралул ва спортрал фестиваль нанисса стадиондалул чIарав Ухссавнил Ккавкказуллал федерал округраясса цинярдагу регионнал цалла-цалла культура, багьу-бизу ва аьдатру кка­ккан дуллалисса майдан тIивтIуну бия. Дагъусттаннал майдандалийн наними хъамал хьунабакьлай бия зюннав-дачIулухун, хъамалу буллай бия миллатирттал дукрардайну.
Ингушетияналмур майдандалий оьрчIан цIа дизлазисса аьдат ккаккан дуллай, фестивальданул хъамаллурал оьрчIан дирзунни «Рамзан» тIисса цIа, Чачаннал ва Дагъусттаннал бакIчитурал хIурматран.
Фестивальданийн бувкIсса регионнал бакIчитурал бувгьунни цала цIарду кусса мурхьругу.
ХьхьичIми шиннардий­сса фестиваллай кунна, ва ххуллухгу хьхьичIунсса гьурттушинна дунни Дагъусттаннал цачIундур командалул, бувгьунни кIилчинсса кIану. Цалчинсса кIану бувгьунни фестивальданул заллухъруннал – Ингушетиянал цачIундур командалул, шамилчинсса кIану – Къабардин-Балкьарнал респуб­ликалул командалул. ДакIнийн бутан, Дагъусттаннаясса командалул 2010-ку шинал бувгьуну бивкIссар 4-сса кIану, 2011-ку шинал – 5-сса кIану, 2012, 2013, 2014-ку шиннардий – 2-сса кIану, 2015-ку шинал – 1-сса кIану.
Фестивальданул лагрулий хьунни хIат-хIисав дакъасса шадлугъру, бяст-ччаллу.
ХIадур бувссар
Бадрижамал Аьлиевал