Лакрал райондалул администрациялул ОьрчIащалсса ва жагьилтуращалсса даврил отделданул, Терроризмалийн къаршисса даврил отделданул ва КIулшиву дулаврил управлениялул цачIуну дунни Дагъусттаннал аьрщарая чапхунчитал лихъан бувсса кьинилун хас дурсса цаппарасса мероприятияртту.
Зулайхат Тахакьаева
Ми дунни Лакрал райондалий 2016-2017-ку шиннардий жагьилтурал политика зузи даврил муниципал программалул лагрулий. Миннувасса ца мероприятие хьунни Кьубав Дагъусттан террористурацIа марцI баврил цIаний жан кьурван дурсса Аьрасатнал Виричу Гапал ХIажиевлул гьайкалданучIа. Муний гьуртту хьунни райондалул организациярттал каялувчитал, школарттал директортал, Кьубиял шяраваллил бакIчи ва дуклаки оьрчIру. Мероприятие тIитIлай, Кьубиял школалул директор Муса Братиловлул кIицI лавгуна террористуращал талай оьрмулуцIа хьушиву кIия шяравучу — Гапал ХIажиев ва МахIаммад Берцинаев ва ми паччахIлугърал наградарттан лайкь бувшиву (ливтIуну махъ). Гаппал ХIажиевлун – Виричунал цIуку, МахIаммад Берцинаевлун – Чувшиврул орден.
Ихтилатру бувна оьрчIащалсса ва жагьилтуращалсса даврил каялувчи МахIаммад Гадаевлул, терроризмалийн къаршисса даврил отделданул каялувчи Щамххал Сайпуллаевлул, Кьубиял мизитрал имам Щайхмурад ХIажимурадовлул.
Кьубиял школалул дуклаки оьрчIал бувсуна вирттаврал виричушивурттая бусласисса лахIзардая, дурккуна миннан хас дурсса назмурдугу.
