Дагъусттаннал БакIчи Рамазан АьбдуллатIипов сентябрьданул 25-нний гьуртту хьунни СКФО-рал субъектирдал каялувчитуращалсса хьунабакьаврий. Мероприятиялий гьуртту хьуссар Аьрасатнал Ухссавнил Ккавкказуллал иширттал министр Лев Кузнецов. Хьунабакьаву хьунни Ккавкказуллал халкьуннал спортрал ва культуралул фестивальданул хъаттиралу, гьашину му хъанай дур Ингушетиянаву.
ХIасан Аьдилов
Хъамаллурахь аьла-ссалам буллай, Ингушетиянал БакIчи Юнус-Бек Евкуровлул бувсунни Ккавкказуллал халкьуннал спортрал ва культуралул фестивальданул хъунмур мурад бушиву чIаххувсса уссушиврийсса регионнал халкьуннал дянив хIала-гьурттушивуртту цIакь даву.
«Аьрасатнал Президентнал СКФО-райсса цалчинма вакил Александр Хлопониннул пикри хьуссар Ухссавнил Ккавкказуллал субъектирдал цIа дуккан дуван цамур форматрай, хъинчулий. Цанчирча та чIумал жуятува гъалгъа тIун бикIайва негативну, яни оьчулий, террорчишиву ва экстремистшиву тIисса махъру хIала буллай. Мунияту хIасул хьуссар «Ккавкказуллал тIуркIурду», жагьилтурал форумру «Машук», «Архыз», ми кIулну бур федерал даражалийгу. Миннул хъунмур мурад бивкIссар Ккавкказ цамур бушиву чIалачIи баву, Ккавкказ – му спорт, дакьаву, культура бушиву. Му мурадрайн жува бивссару», — увкунни Евкуровлул.
Лев Кузнецовлул регионнал бакIчитурахь барчаллагь увкунни фестивальданий гьуртту шаврихлу. «Хъинну агьамсса затри хIакьину дуллалисса ва даву гьарта-гьарза дуллай, муния хайр ласаву. Муния цуксса мюнпат буссаривгу жунма ккавккунни Олимпий тIуркIурдаяту Ккавкказнавасса оьрчIал 2 мусил медаль ларсун бувкIсса чIумал», — увкунни ганал.
Рамазан АьбдуллатIиповлулгу мукунма бувсунни фестивальданул агьамшиврия. «Расул ХIамзатовлул увкуна, цуксса хIайпнугу, культуралул кIану физкультуралул бугьлай бур, куну. Амма ва ишираву цанницIун ца даркьуну дур культура ва спорт», — увкунни Республикалул хъунаманал.
ДакIнийн бутанну, фестиваль дуллай бур 2010 шиная шинмай. Гьар шинал мероприятиялувух гьуртту шайссар 7 команда – ми хъанахъиссар 700 гьурттучунаяр ххишаласса. Тикку 12 спортрал журалий буссар най бяст-ччал.
