Сентябрьданул 23-нний УнцIукIуллал райондалийсса АшилтIиял шяраву «Куначество как инструмент против идеологии терроризма и экстремизма» цIанилусса Ухссавнил Ккав­кказуллал жагьилтурал слетрал хахливу хьуну бур «Дагъусттанлувтал терроризмалийн къаршину» тIисса «ккуркки стол». Ванивух гьуртту хьуну бур ДР-лул миллатирттал иширттал министр Татьяна Гамалей, ДР-лул БакIчиначIасса террорданиясса мюхчаншиврул ялув ивтсса кумагчи Сайпуттин Саипов, Дагъусттаннал педагогикалул университетрал профессор ПатIимат Оьмарова, Аьрасатнал Ухссавнил Ккавкказуллал федерал округраясса экспертътал, психологтал ва цайми.

З. АьбдурахIманова
БатIаврий хъунмурчIинсса ихтилатругу хас бувну бур щаллагу инсаниятран нигьачIишиву рутлатисса террорданун, экстремизмалия жулла обществалун хъанахъисса зараллан.
Т. Гамалейл кIицI лавгун бур, республикалул сайки циняр министерстварттал ва ведомствар_ттал террорданийн къаршину дачин дурсса аьмсса даврил ххуй чулиннайсса дахханашивур­тту хъанай душиву. Мукунма бувсун бур Дагъусттаннайсса шаннагу диндалул, – бусурманнал, ххачпараснал ва иудейнал, рувхIанийсса сакиншиннардил цачIу дачин дурсса даврилгу рес­публикалул сий лахъ дуллалишиву, миллатирттал цашиврул цIа гьаз хъанахъишиву.
— ХIакьину жула бурж бур, жула маэшат лахъ бувну, жучIан­ма личIи-личIисса регионнаясса хъамал букIлакIи буллансса чаранну ляхълан. Махъсса шиннардий зунттал кIанттурдай бакьин буллай бур ххуллурду, щархъавун дуцлай бур щинну, дуллай бур хъамал бацIансса цIусса къат­ри, объектру. Республикалий туризмалул, социал-экономикалул, культуралул арарду цI удуккан давриха зий бур. ЦIана жува сайки Да­гъусттаннал цIусса тарихраха зий буру. УнцIукIуллал райондалий хъанахъисса ва слетрайн бувкIсса зугу му цIусса тарих чичавриву гьурттуссару, — тIий бур министр жагьилтурахь.
Аьрасатнал личIи-личIисса регионная бувкIсса делегациярттал каялувчитурахь Татьяна Гамалейл тавакъю бувну бур цачIава давурттал щаллу буллан тийх-шийх дуклакисса, ялапар хъанахъисса Дагъусттанная бувкIсса жагьилтал. Цанчирча, террористътурал кьюкьравун кIункIу байми, хъяврин шайми хъунмурчIин даву дакъулт, хаснува жагьилтал, буну тIий.
Мукунма «ккуркки столданух» хьуну бур социал сетирдаву жагьи-жугьулт хъяврин буллали­сса вербовщиктураясса, коррупциялиясса, щархъаву жагьилтал давуртту дакъа бушивриясса, «вацIлува» зана хьусса жагьилтуращал ци давуртту дуллай буссарив бусласисса ихтилатругу.