Аьбдуллагьлул арс Давдиев МухIуттин (Кола)

Цаппара хIаллай къашавайгу ивкIун, дунияллия лавгунни цинявннангу кIулсса дарзинал Давдихъал Аьбдуллагьлул ва Хъунмутахъал Марияннул арс Давдиев МухIуттин (Кола).
МухIуттиaн увну ур 1959 шинал дарзинал кулпатраву Ккуллал шяраву. Ккулув дянивмур даражалул школа къуртал бувну махъ, МахIачкъалаллал автомашинар­ттал ва ххуллурдал техникум къуртал бувну, зий уссия Бесланнай жура-журасса ххуллул давурттай. Цала 3 шинай­сса аьралий буржгу лавхъун, зий уссия ялагу Бесланнай ххуллурду бакьин бувай­сса идаралий. Хушрай лавгссия Чачаннавун, Ассиновка шяравусса организациялий ххуллул давур­тту дуллан. Муния махъ уссия зий Къизилюртлив мува ххуллул идаралий, личIи-личIисса строительствалул давурттай Новостройрай. Чув, ци даврий зий ивкIун ухьурчангу, МухIуттиннул цува ккаккан айва хъинну пагьму-гьунар бусса пишакар, дакI марцIсса инсан ушиву, хъунимигу, мюрщимигу мунащал ца уссищал кунма бикIайва. Мунал бия чIявусса дустал, гьалмахтал, цала уссу-ссурваврал, гъан-маччанал чIарав ацIан чялиш­сса ия, яхIгу, инсаншивугу дусса зун­тталчу ия. МухIуттиннул ва ванал кулпат ХIабибатлул хъунигу бувну, цала оьрмулул ххуллийн бивчунни 3 арс. Цибанссар, лавгунни жуятува МухIуттин, чIун дакъана, оьрмулул уччиннин къаивтун.
Жу цинявппагу, МухIу­ттиннул дустал, гьалмахтал, Ккуллал ва ЦIуссаккуллал жямат, ва хъинну кьурчIисса, бухIан захIматсса бивкIулул жижара буллай буру кулпат­рахь ХIабибатлухь, арсурваврахь Русланнухь, Рустамлухь ва Исламлухь, миннал кулпатирттахь, уссурваврахь, ссурваврахь, цинявппагу гъан-маччанахь, щалвагу агьулданухь. МухIуттиннун къабуллусса оьр­му мунал оьрчIан, кулпатран, цинявппагу уссурвавран, ссурваран, махъсса гъанчунан булуннав, гьав нурданул дуцIиннав, алжаннул ххари аннав.
Ва кьурчIишиву духIансса ссавур зухьхьун Аллагьнал дулуннав!
Ккуллал
ва ЦIуссаккуллал жямат

Муртазааьлил арс Мисрихан

Уттигъанну хархавар бакъа­сса бивкIулул оьрмулул 67 шинаву жуяту личIи унни ххаллил­сса зунтталчу, Бархъаллал шяравасса Муртазааьлил арс Мисрихан..

Мисрихан ия дакI-аьмал авадансса, багьу-бизу дугърисса, ччимур ишираву вихшала дишин бучIисса адимина.
ЧIярусса шиннардий Мисрихан зий уссия МахIачкъалаллал таксопаркраву таксистну. Мунияр махъ КАМАЗ-рай архсса аьр­ххирдай занай икIайва.
ОьрчIнийва захIмат ккавк­сса, захIмат ххирасса Мисриханнул, чув, ссаха зий ухьурчагу, дуллалимур дагьайкун, дирчIан дурну дайва. Ялттутувасса кушу ванан къаххирая. Ва хIурматрай икIайва архIал зузиминначIа.
Мисрихан ия дакI марцIсса, гъан-маччанай дакI цIуцIисса, шяравучунал, чIахху-чIарах­миннал чIарав ацIайсса, шай­сса кумаг байсса инсан. СсахчIав къаурувгун, ияйва гьарица бивкIу-буккулийн. Цала кулпат къашавай хьусса чIумал ванал муниха дурсса аякьалия хIакьинусса кьинигу буслайнма бикIай шяраваллил жямат. Ва ия мукуна оьрчIал лавай авцIусса, ми дазу-зума дакъа ххирасса бутта.
Мисрихан дунияллия лавг­сса хъуннасса кьурчIишиву кIидачIлай, жижара буллай буру оьрчIахь, ссийхь Зулайхатлухь, махъсса гъан-маччанахь. Имандалий лавгун лякъиннав, рухI алжаннул ххари даннав.
Бархъаллал жямат