Дагъусттаннал Миллатирттал Цашиврул кьинилун хасъсса шадлугърал батIаву хьунни МахIачкъалаллал «Ак-Гель» паркравусса оьрус учительницал гьайкалданучIасса майданнивгу. Шадлугърал сакиншинна дурну дия шагьрулул культуралул управлениялул.
Ссутнил хIахI бусса, бявкъусса марч бивкIнугу, шикку нанисса тяхъашивурттавух гьуртту хьун, концерт ккаккан бувкIун бия мюрщи-хъуни. Концертравух гьурттуну бия республикалий цIа дурксса къавтIавурттал ансамбльлу ва дагъусттаннал эстрадалул балайчитал. Спорт ххираминнангу бия цанма-цанмалусса бяст-ччаллу нанисса майданну. Гъира бусса гьарнаща бюхълай бия ка дишаврил, алхъан кIункIу даврил, цаннайх ца кIараллу бищаврил, стритболданул ва шахматирттай буккаврил бяст-ччаллавух гьуртту хьун.Яла мюрщими тамашачитал тяхъа-шад буллайгу бия магьравасса жанавартрал, геройтурал лаххи-ликкиялувусса аниматортал.
Байрандалущал МахIачкъалаллал халкь барча бан шадлугърайн увкIун ия шагьрулул бакIчи Муса Мусаев, ванал хъиривчутал- Аьбдулмуъмин Ибрагьимов, Запир Алхасов, культуралул управлениялул хъунама Фарид Абалаев ва цаймигу.
Шагьрулул бакIчинал, циняв барчагу бувну, кIицI лавгунни, « миллатирттал цашиву» тIисса мукъурттил куртIсса ва хъуннасса мяъна душиву.Бувсунни МахIачкъала чIяву миллатру яхъанахъисса шагьру бушиву ва ми цинявгу, ца кулпат кунма, бавкьуну яхъанай бушиву. БакIчинал мукунма бувсунни, махъппурттуву халкьуннал оьрмурду бигьа баву мурадрай шагьрулий дуллалисса давурттая, тIивтIушиву оьрчIансса садикру, цIусса школарду.
-Ххуйсса давурттацIун бур ттигу шагьрулий щаллу бувансса масъалартту. Масалдаран, цинявннал зума-ккарччулусса ччюрклицIа шагьру марцI бан аьркиншиврул масъала. Мунихагу зий буссар хасъсса пишакартал, амма зул чIарахбацIаву дакъа, зул гьурттушинна, зул дакIцIуцIаву дакъа, ва масъала ца жущавалу щаллу бан къахьунтIиссар. Умуд бур, хIурмат бусса МахIачкъалаллал халкь, зугу жуцIун кабакьинссар тIисса,-увкунни М. Мусаевлул.
Концертраяр махъгу халкь занайнма бия паркравух сайрданий.
Лажин хIадур дурссар З.АьбдурахIмановал
