Ххуллун кьини Гъумук лавайсса даражалий хьунни СССР-данул спортрал мастер, 60-ку шиннардий Дагъусттаннал волейболданул цачIундур команданал капитанну ивкIсса, РСФСР-данул цачIундур командалуву уклай ивкIсса Оьмаров Нуруллагь Бадруттиннул арснал оьрмулун 80 шин там шаврил юбилейран хас дурсса волейболданул турнир.

Зулайхат ТАХАКЬАЕВА
Гьарцагу Лаккуй хъанахъисса давурттаву ва иширттаву чялиш­сса гьурттушинна дайсса лакращал ва унгу-унгусса спортрал байрандалийн бувкIун бия чIаххувсса Гъуниннал райондалиясса бусрав­сса хъамалгу.
Муний гьуртту хьунни: Аьбдулварис МахIаммадов, Гъуниннал райондалул ОВД-лул каялувчи; Аьбдуллаев Ссапар, ДР-лул Жяматийсса Палаталул хъунаманал хъиривчу; Аьбдуразакьов Сайпуллагь, ишбажаранчи; Илиясов Мираб, ишбажаранчи; ЦIаххаев Султан, райондалул собраниялул депутат; Оьма­ров Багьауттин, ишбажаранчи; Исяев Юнус, ишбажаранчи; Инков Кикав, ишбажаранчи, Италиянава хасну ва мероприятиялийн увкIсса (ЧIухърал шяраватусса); Сулайманов Аьбдулбасир, Нуруллагь ­Оьмаровлущал уклай ивкIсса Ккурккуллал командалувасса; ­Валиев МахIаммад, ДР-лул промышленностьрал ва машлул министерствалул хъунама пишакар-эксперт; ЦIаххаев Шамил, КIундиннал шяраваллил командалул (Саратоврая дуркIсса) капитан. Шиккува кIицI бан, КIундиннал команда гьарца шинал Ххувшаврил байрандалун хас дурсса волейболданул турнирданий гьуртту хьун дучIайссар Саратоврая. Командалуву буклай бу­ссар Шамиллул дустал, оьрус миллатрал инсантал.
Турнир тIитIлай, райондалул администрациялул спорткомитет­рал хьхьичIунсса пишакар Малик ХIусмановлул оьвкунни ччаллий дуклакисса командарттайн: Ххюлуссуннал, КIундиннал, Щардал, Гъумучиял, ХьурукIуннал, ЧIурттащиял, Ккуллал райондалул, Аьрасатнал МВД-лул «Лакский» МО-лул командартту.
Хъирив райондалул администрациялул бакIчи Юсуп МахIаммадовлул кIицI лавгуна, так ца лакрал миллатрал акъассагу, щала Дагъусттаннал пахрулун­сса арс Нуруллагь Бадруттиновичлул даражалул волейболистал жула республикалия чIявусса бувккун бакъахьувкун, хъун хъанахъисса никирахьгу жула хIакьсса патриотътурая бусансса мурадрай дуллалишиву ва спортрал байран.
Бувсуна 50-ку шиннардий хъун хъанахъисса никиран Нуруллагь бунияла эбратну хьусса инсан ушиву.
— Гъумук волейболданул тIуркIу бусса бавукун, райондалул гьарца щархъава жагьилтал бучIайссия тIар ванах буруган. Ва Дагъусттаннал цачIундур командалул капитанну усса чIумаллив цайми миллатирттал агьлугума, цала командалухлунияр, Нуруллагьлухлу буклан бикIайссия тIий буслан бикIай та оьрмулул инсантал, — увкуна Юсуп МахIаммадовлул.
Дагъусттаннал спортраву бивхьусса захIматрахлу Нуруллагь Бад­руттиновичлун буллуна райондалул администрациялул ва жяматрал цIаниясса барчаллагьрал чагъар, лавххуна кIяласса варси, ссуркьяпа, пишкаш дуруна багьлул ххира­сса ххаржан.
Дурккуна ДР-лул Халкьуннал Мажлисрал хъунама Хизри ­Шихсяидовлул цIания Нуруллагь Бад­руттинович барча уллалисса телеграмма.
Цала заманнай бусалардавун агьсса спортсменнал тIуркIулух ургансса талихI цанмагу хьушиву кIицI лаглай, Ссапар ­Аьбдуллаевлул увкуна:
— На оьрчIнийсса заманнай Гъумук школданул азбардануву шай­ссия цIанихсса тIуркIурду. Гиву инсан ацIансса кIану къабикIайва. Цаннияр ца гужсса командартту дикIайва Гъумучиял, Ккурккуллал, ГьунчIукьатIрал, Ури-Мукьардал, Шахьуйннал, Хьурттал. Бяст-ччал унгу-унгусса шайва, мюрщиминнаннив га дикIайва яла ххаримур ва хъуннамур байран.
Нуруллагь Бадруттиновичлул цIа тIурча, чIивиналгу, хъунаналгу зумату щяв къадишайва. На ва ккалли ара Лакрал райондалия увксса ца яла лайкьма инсаннан, лайкьсса арсругу тарбия бувссар, — увкуна ванал.
ЧIявусса лакрал жагьилтуран куна, инсаншиврийгу, пишакарсса спортсмен хIисаврайгу Нуруллагь Бадруттинович цанагу кумирну хьушиву бувсуна Шяраваллил хозяйствалул институтраву тренерну зузисса Аслан Къажлаевлул.
— Агарда бивкIссания Дагъус­ттаннай волейболданул Музей славы, микку хьхьичIра-хьхьичI дикIанссия Оьмаров Нуруллагь Бадруттиновичлул цIа, – увкуна ванал.
КIицI лавгуна 80 шин хьуну ухьурчагу, хIакьинусса кьинигу учIайшиву ва Шяраваллил хозяйствалул институтрал спортзалданувун, жагьилма мяш хьунну ххаллилну уккайшиву бадментондалий.
Аьбдулварис МахIаммадовлул бувсуна цIанихсса спортсменнал завалунсса шадлугърайн Гъуниннал райондалия бувцуну увкIшиву таний ванащал ччалли буклай бивкIсса спортсментурал наслу. Ми буклай бия райондалул полицанал отделданул командалухлу.
Миллатрал цIанихсса арснал савлугърансса мажлис бивхьуна Гъумучиял столовыйлуву. Му мажлисрал тямадашиву дуллай ия Ссапар Аьбдуллаев. ЧIявуя гиккугу Нуруллагь Бадруттинович лахъа-хъун уллалисса ихтилатру.
Ккурккуллал школалул директор Даниял Магьдиевлул бувсуна 50-60-ку шиннардий, МахIачкъалалив волейболданул тIуркIу бушиву бавукун, шяраваллава жагьилтал лагайсса бивкIшиву Нуруллагь Бад­руттиновичлухлу буклан.
— Дуниял ххуй дан лявхъусса инсантуравасса цар Нуруллагь, гьунаргу, дакI марцIшивугу, дакI хъиншивугу, Дагъусттан гьаз бансса каши-кьудратгу Заннал цан дуллусса.
Буцинна Нуруллагь Бадруттинович, гьунар бюхттулсса ухьурчагу, дакI хъун дакъасса инсан ушиву тасттикь буллалисса ца мисал. 1959 шинал «Динамо» стадиондалий бия республикалул волейболданул командарттал бяст-ччал. Гикку гьуртту хъанай бия Ххунзахъиял, Бущихъиял районная бувкIсса цIанихсса волейболистал, цавай чурххалгу бювхъусса жагьилтал. Жу гайннах буруг­лай, хIайранну бунува: «Тана жула Нуруллагь, тана жула Нуруллагь», — тIий ххарисса аваза гьаз хьунни тамашалийн бувкIминнаву. Нуруллагьма пиш-пишгу тIий гъан хьунни инсантурачIан, — увкуна ванал.
— На икIайссияв легкая атлетикалийн занай. Ттул муданасса болельщик ХIажиев Аьбдурашидлул ца кьини на увцунав, ачу ца ххаллилсса лаккучунащал кIул аннача на ина, куну. Дяъвилия махъсса кьянатсса, ккашикарсса шинну дия тай, спортралсса буллансса гъирагу бакъая инсантураву. Нуруллагьлул тIурча цала гьавасрайну инсантуравун спортрахсса гъира бувтуна. Инсантуран ччяни бусрав хьуна. Уттигу бусравнува уссар, — увкуна спортсменнал дус-ихтивар Дундар ХIажиевлул.
Райондалул больницалул хъунама хIакин АьбдурахIин Дибировлул кIицI лавгуна Нуруллагь Бадруттинович хъанай ушиву Дагъусттаннал волейболданул тарих чивчусса инсантурава­сса ца.
Султан ЦIаххаевлул кIицI лавгуна цала оьрчI заманнай кьянатсса зунттал райондалул шартIирдаву спорт хьхьичIунну къадиркIшиву, мунийн бувну цува мудангу пахрулий ушиву райондалий спорт хьхьичIунмай шаврил бакIщаращуй ивкIсса Нуруллагь Оьмаровлуя ва цувагу ганаха лащан хIарачат буллай ивкIшиву.
Ихтилатру буллалими цинявппагу кIицI лаглай бия Нуруллагь Бадруттиновичлул хIур­мат хъунмасса бивкIшиву укунма­сса инсантурачIагу, къуллугъ­читурачIагу, республикалул каялув­читурачIагу.
Бяст-ччал унгу-унгусса хьуна. Му хьхьунил ссят 12 хьуннин лахъи гьарчагу, къуртал хьуннин я райондалул бакI дургьуми, я бувкIсса хъамал, я тамашачитал пас къавхьуна.
Турнирданий ххув хьунни Аьра­сатнал МВД-лул «Лакский» МО-лул команда, 2-мур кIану бувгьунни Гъази-Гъумучиял командалул, 3-мур кIану – ЧIурттащиял командалул.
ТIуркIулуву ляличIину бук­лай бивкIсса спортсментуран дуллуна хасъсса бахшишру: «Лучший игрок» – Гъумучиял командалувасса Рамазанов ХIажиоьмар, «Лакский» МО-лул командалухлу уклакисса Гъуниннал райондалиясса Щайхаьлиев Мурад; «Лучший нападающий» — МахIаммадов Аьлил , «Лучший защитник», «За компетентное судейство» — Суллаев ХIажимурад; «Молодой игрок» — ЧIурттащиял командалувасса Кьурбанов Марат; «За волю к победе» ва «Приз зрительских симпатий» дуллунни Саратоврая КIундиннал командалухлу буккан бувкIсса хъамаллуран Ххув хьуминнан буллуна кубокру, дипломру, хIурматрал грамотартту ва арцуйнусса бахшишру.
«Лакский» МО-лул командалул цаламур арцуйнусса бахшиш щалла дуллунни къуллугърал бурж биттур буллай ливтIусса полицалул зузалтрал оьрчIан.
Турнир ларкьуна Нуруллагь Бад­руттиновичлул арсваврал — Ибрагьимлул ва Нурулисламлул итадаркьусса сайки 4 минутIрайсса яргсса салютрайну.