Августрал 27-нний Къяннал, Хъювхъиял, Вихьуллал, Ссухъиящиял, ЦIуйшиял шяраваллавун чявхъа бивчуну, хъунисса зараллу хьунни. Инсантурал къатрал магъив ларсун, ккутIа-вярчIари хьунни, диян дурасса бакIлахъия зия хьуну, аьрщаращал кьа дурунни. Къурдарах бивкIсса инсантурай щавурду хьунни.
Хъиннува хъунмасса зарал хьунссия жул Вихьуллал жяматрал гъаттаран, шяраваллил хьхьичIсса арияту ми, чявхъа бичлан бикIайхту ливхъун най, ЦIуйшиял шяраваллил чулухсса ратIув ххяххан бивтссания. Му чIумал гайннучIа ивкIсса жул шяравучу Ясупиев Илияслул бия гуж-къиялий зана бивтун, ратIув къаххяххан. Ганал цалагу чурххай, бакIрай, лажиндараву дия оьбацIуртту, щавурду хьуну.
Жу, Вихьуллал жямат, хъунмасса барчаллагь баян буллай буру Илияслуйн. Вихьхьун, ниттихьхьун, кулпатрахьхьхьун цIуллушиву дулуннав. Ина дурсса виричушиву жул дакIния къагьантIиссар!
Вихьуллал жяматрал цIанияту ХI. ХIусайнов
