Ккурккуллал шяравасса Тажуттиннул арс Нариман увну ур хъудугьул кулпатраву 1935 шинал сентябрь зурул 8-нний. 1955 шинал цинявппа жагьилтуравух школа къуртал бувсса Наримангу увцуну ур аьралуннаву къуллугъ буллан.

Ти­кку ванал бувккуну бур механик-электриктурал школа, 2 шинай ивкIун ур Винницкий областьрай реактивный самолетирттал механик-электрикну. Шикку къуллугъ буллалисса чIумал гьарица полетран хасну ваналитадакьайсса диркIун аьрали листокру. ХьхьичIва аьралуннаву хьхьичIунну, бусравну къуллугъ буллалисса жагьилтал ВУЗравун бухханшиврул ккаккан дурсса чIумуяр хьхьичI итабакьайсса бивкIссар. Нариман къуллугъ буллай ивкIсса частьрава мукунсса, чIун къуртал хьуннин итабакьаву тIалав буллалисса, 30 жагьилнал аьрза буллуну бивкIун бур. Вайннава ккаккан дурсса чIумуяр хьхьичI итаавкьуну ур 3 жагьил, миннавух – Нариман Щайховгу.
Ва чIаванияцIава ивкIун ур чил билаятирттал мазру ла­хьхьин гъирарай. МарцIну ххювардай экзаменнугу дуллуну, увххун ур Ленинградуллал (утти Санкт-Петербург) чил билаятирттал мазурдил институтравун. Му къуртал бувну махъ Авгъаннавун тIайла увккун, микку дурну дур сайки 7 шин референтну зий.
1975 шинал Авгъанисттанная увкIун махъ, зун ивкIун ур Дагъусттаннал Тарихрал, мазрал ва литературалул институтрал Востоковедениялул отделданий элмийсса пишакарну. Ва институтраву зий дурну дур 6 шин. Муния махъ Нариман зун ивкIун ур «Дагобсовпрофрал» чил билаятирттайнсса туризмалул инструкторну. Шиккугу ванал ккаккан бувну бур цала бюхъу ва гьунар 10-нния лирчусса шиннардий зий.
1994 шиная шинай Нариман ур МахIачкъалаллал 11-мур гимназиялий аьраб мазрал дарсру дихьлай.
Нариман Тажуттинович хъинну жаваблувну ва дакIнийхтуну зузисса инсан ур. Му бакъассагу, ва ур цалла цIуллу-сагъшиврул ялув кьянкьану авцIусса, цайминнан цува чIяву хьун къаччисса инсан.
— На вай цIанакулсса инсантал куна тачIав за хъамабивтунни тIун къаикIара. БакIрал цIуцIаву цирив къакIулли, да­къар ттул склероз, къакIулли ттун къюкI чув дуссарив, ягу давление цирив. КарчI къадурну, гьарица кьини кIюрххил ца ссятрай лечара, хIарачат буллан икIара чIявусса къуццу буллан. Му бакъассагу, на оьрчIния шихунай шания ивзтари гьарца кIюрххил дяркъусса щинавун учIлай аьдат хьуну ура. Вай махъсса шиннардийннин на уссияв гъина, кIина хьхьиривун учIан занай. Мунияту ттун грипп цирив къакIулли. Инсаннан яла хъинмур дарув бур чIявусса къуццу буллалаву. ЦIуллу-сагъшиву дуруччаву мурадрай, на маслихIат буллай ура чIявусса чимус ва лаччи канан. Ялагу, ттула оьрмулуву на я хIанттил, я пиволул ххув кусса акъара. Хъярчлийрагу пIапIрус цукунсса дурив ххал къадурссар, — тIий буслай ур цала оьрмулул цIакьсса кьанунная Нариман Тажуттинович.
Ванан ххирар дакIнийн дичлан цува коммунист партиялуву ивкIсса шинну. Ва ур, хъазамраву къюкI ришлай дуссаксса, цанна циксса бахшишру дулларчангу, щищакIуй къахьунтIиссар цала партиялийн хаин хьун ан тIий, хIакьинусса кьинигу кьянкьану коммунист партиялул чул бувгьуну.
Нариман Тажуттинович ур цинявннан эбратну, узданну ва марцIну оьрму бувтсса инсан. Мукуна ва ур «Илчи» кказит буклай байбивхьуния шихунмай цуппа ца кказит лях гьан къабивтсса буккугу.
Сентябрь зурул 8-нний Нариманнун бартлаглай дур 81 шин.
ХIурмат лавайсса Нариман Тажуттинович, дулуннав вихьхьун оьрмулул 90, 100 шин дувансса цIуллушиву ва каши-кьудрат, ина вила наслулул ххари уллай итаннав, чан къабаннав лакрал миллатраву ина кунма­сса арамтал.