Ва нюжмардий Каспийскалийсса Аьдатирттал культуралул центрданий Дагъусттаннал Цашиврул кьинилун хасъсса батIаву хьунни.

З.АьбдурахIманова
Шикку шагьрулул школардал дуклаки оьрчIругу гьуртту хьунни. Махъсса шиннардий кIицI лаглай байбивхьусса ва байрандалул тарихрая цIубакIрай бувсунни центрданул хъунмур Башикар Вагьабовал. КIицI бувунни байран дувайсса сентябрьданул 15-сса кьини Дагъусттаннал миллатирттал тарихраву агьамсса кьини душиву. Цила ихтилатраву ванил чIурчIав дурунни республикалул БакIчи Р. АьбдуллатIиповлул увку­сса : «Халкьуннал цачIуншаву — ми укунмасса куклу махъру ба­къар. Му оьрмур, му жула философияр, жула асардур, жула яхI-намусри», — тIисса мукъурттий.
Мукунма байрандалущал барча баврил махъ лавхъунни КМШИ-лул хъунмунил хъиривчу Светлана Корниенколгу. Ванил кIицI лавгунни, Дагъусттаннал миллатирттайн уссурвал кунма яхъанан аманат бувну бивкIшиву жула ппухълуннал, хъунмур никирал.
Светлана Корниенкол оьр­чIахь маслихIат бувунни Надир-шагьнал аьрал ххит буккан бувсса кIанайсса «Ватан» тIисса мемориал комплекс ххал бан гьан.
Шадлугърал ахирданий С.Агъа­бабовлул цIанийсса Кас­пийскаллал магьирлугърал школалул дуклаки оьрчIал цала гьунарду ккаккан бунни.