Сентябрь зурул 22-нний Кремлилуву хьунни Аьрасатнал Федерациялул наградартту дуллалисса церемония. Наградар­тту лайкь дурми барча буллали­сса цала ихтилатраву Аьрасатнал Президент Владимир Путиннул увкунни: «Зу чIявуминнал зула оьр­мулул шинну Ватандалул цIаний захIмат буллай,

къуллугърал буржру дакI марцIну бартбигьлай гьан дурссар. Ца-ца инсаннан цаппара минутIру, ца лахIзагу гьа шай виричушиву дан, цува цу уссарив ккаккан бан. Ттул ихтилат Виричунал цIа лайкь дурсса Дагъус­ттаннаясса полициялул лейтенант МахIаммад НурбахIандовлуятур. ХIакьину шикку бур ванал нину-ппу. ХIурмат бусса НурбахIанд МахIаммадович, хIурмат бусса Кумсият АьвдурахIимовна. Зу тарбия увну ур цила икIайкунсса адамина. Жува циняв ччяни ягу чIалну ва дунияллия гьантIиссару. Цуманал цукунсса оьрму бувтун, лавгссарив – мури агьаммур. Жула хIаписарнал ккаккан бунни цала яхI. Щалагу билаят барчаллагьрай бур зуйн гукун­сса арснахлу».
Укун бюххансса махъругу увкуну, Президентнал буллунни Аьра­сатнал Виричунал мусил цIуку къучагъсса дагъусттанчунал нитти-буттахьхьун.
МахIаммад НурбахIандовлул бутталгу барчаллагь увкунни Президентнахь цала арснал виричушиврун лавайсса кьимат бивщуну тIий.
«Щак бакъар кIилчин оьрму булурчагу, ганал вара тIул дувантIишиврий. ХIакьину жу­хьхьунма буллусса Виричунал цIукулулгу, дакI дансса мукъурттилгу жувун гуж бувтунни, бучIантIимунийнсса вихшала дуллунни. ХIурмат бусса Владимир Владимирович, Заннал уруччиннав ина. МукIрура жула арснал дур­сса тIул полициялул янналувусса, оьхIалшиврущал талатисса гьарица инсаннан эбратну хьушиврий.
Зузияра, уссурвал. Барчаллагь», — увкунни Виричунал буттал.
Республикалул БакIчи Рамазан АьбдуллатIиповлул увкунни: «МахIаммадлул виричусса тIулданул цал ттигу исват бунни дагъусттанлувтал тачIавгу нигьа къабувсшиву ва къабусантIишиву къачагътурая. Ванал къучагъшиврул терроризмалущал талай жула билаятрал дуллалимунил жям дунни. Ва данди бацIавриву Аьрасат ххув хьунни.
Цува ивчIаннин «Зузияра, уссур­вал!» увкунни МахIаммад НурбахIандовлул. Хъинну бусрав хьунни Президентнал Ма­хIаммадлул кулпатрах дурсса аякьа.
Владимир Владимировичлущал хьунабавкьусса чIумал, жу бусарду тара кьини къачагътурал бивтун увтсса МахIаммадлул ссурахъу Аьвдурашид НурбахIандовлулмур къучагъшивриягу. Ванангу дулунссар хIукуматрал награда тIий ура».