Сентябрьданул 28-нний Дагъусттаннал БакIчи Рамазан АьбдуллатIиповлул каялувшиврулу хьунни ДР-лул Терроризмалийн къаршисса комиссиялул батIаву.
Цалва хьхьичIмукъуву Рамазан АьбдуллатIиповлул увкусса куццуй, ихтиярду дуруччай органнал хIарачатирттайн бувну аьмну бювхъунни чан буван республикалий террорчишиврул ва экстремистшиврул ишру. Ганал бувсунни цукунсса давуртту дурну диркIссарив Дагъусттаннай ми ишру чан баншиврул.
ДР-лул печатьрал ва информациялул министрнал кIанайсса МахIаммадбаг АхIмадовлул бувсунни интернет-пространствалий дурсса давурттаяту идеологиялийн къаршину. Ганал бувсмунийн бувну, 2016 шинал интернетрал сетьраву дирхьуну дур террорчитурал бандподполье оькки-ккаккул дуллалисса, агьалинахь преступниктурал хъирив багьну бушиврия бусласисса макьалартту ва цаймигу материаллу. Ганал мукунма бувсунни Координациялул культуралул ва информациялул центрданул дуллалисса давурттаяту.
Ххал бигьлагьисса масъалалул хIакъираву ихтилат бунни Къизилюртуллал райондалул бакIчинал кIанайма Гагарин Оьмаровлул.
Рамазан АьбдуллатIиповлул бувсунни интернет-сетьраву зун лавайсса даражалул пишакартал буцин аьркинну бушиву.
БатIаврий гьуртту хьуминнал ххал бивгьунни чIявусса инсантал салкьи шайсса объектру террорчитурая буруччин аьркиншиврул хIакъиравусса масъала. Муния ихтилат бунни ДР-лул виваллил иширттал министрнал кIанайма АхIмад Баталиевлул. Ганал бувсунни участокрал инспектортурал дурсса ва дуллалисса давурттая.
Ххал бигьлагьисса масъалалул хIакъираву цалвами пикрирдая бувсунни Къизилюрт шагьрулул бакIчи Алмаз Бековлул, «Дагестанская сетевая компания» АО-рал директор Гимбат Гимбатовлул ва цайминналгу.
БатIаврий ххал бивгьунни цаймигу масъалартту.
