Жула республикалул хъуншагьрулул дязаннив, Расул ХIамзатовлул цIанийсса проспектрай, Дагъусттаннал Культуралул министерствалул къатрачIа, дацIан дунни цIусса скульптура. Му дур щала тIаннул, аьщуйн щуну учиннив, мурхьирал ухнийра цIувцIуну, ккаккан дурну дур зунттал шяравалу: къатри, зунттал шяраваллил къумасса кIичIиртту, чIалъаьрду.
Бадрижамал Аьлиева
Ва скульптуралул композициялул сиптачитал бур ДР-лул Культуралул министерство. Скульптура щаллу дурну дур Жамаллул цIанийсса Дагъусттаннал художествалул училищалул выпускниктурал: Мирза Шагьмановлул, МахIаммад 
Атрачевлул ва АьбдулпаттахI Мирзоевлул.
Шагьрулуву ххи хьусса скульптура агьалинангу даши дирзунни. Ванил суратру дурккунни интернетраву ва республикалул СМИ-рдай.
Ванил автортурал бусаврийн бувну, ва хъанай дур вайннал дипломрал даву, лавайсса кьиматирттан лайкь хьусса. БакIрайра ва проект аьрщарая щаллу дурну диркIун дур вайннал. Гихуннай ва даххана дуллай, та ххи дуллай, бивну бур ва цIанамур вариантрайн.
— Жун ва пикри найбунава ххуй бивзуна. Байбивхьуру зий. Дахханашивуртту дуллай, ахирданийгу хьунни укунсса скульптура. Хъинну ххариру жула даврин багьайсса кьимат бищаврия ва тIааьнну бур интернетраву жулла даврия инсантурал чичлачимур ккалан, — буслай ур МахIаммад Атрачев.
Скульптуралуха зий зуруяр ххишаласса чIун дурну дур оьрчIал. Миннал даврил ялув бавцIуну бивкIун бур Художествалул училищалул директор Мухтар Камбулатов ва мунал хъиривчу Магьди Къараев.
