Дагъусттаннал диндалул комитетраву июль зурул 21-нний хьунни хIажлийн лагаврил масъаларттан хас дурсса заседание. Ва батIаврий гьуртту хьунни Жяматийсса советрал члентал, Дагъусттаннал диндалул комитетрал зузалт, Дагъусттаннал таможнялул, Роспотребнадзорданул, МахIачкъалаллал аэропортрал ва «Марва Тур» туристический авиакомпаниялул вакилтал.
И. Саидова
ХIажлийн лагаврил масъаларттан хас дурсса заседаниялул даву дайдирхьунни Дагъусттаннал диндалул комитетрал председательнал хъиривчу Расул ХIажиевлул. Ванал бувсунни хIажлийн бачин дуллалисса хIадуршиннардая. Гьашину щалагу Аьрасатнан ккаккан дурсса 16400 квоталува Дагъусттаннан ккаккан дурну дур 6000 инсаннансса квота. Республикалий хIажлил масъалартту щаллу буллай, миннуха зий дур «Марва Тур» тIисса компания.
Расул ХIажиевлул мукунма бувсунни кьамул бувну бушиву хIукму, хIажлийн наниминнал мюхчаншиву дуруччаву мурадрай, гьашину хIажлийн нанисса агьали так гьаваллавухсса транспортрай ххилансса.
2016 шиналсса хIаж-компаниялул масъалартту дузал баврил даврия бувсунни Дагъусттаннал диндалул комитетрачIасса Жяматийсса советрал председатель ЯрахIмад ХанмахIаммадовлул. Ванал кIицI лавгунни Жяматийсса советрал давриву хьхьичI ххуттайн лавсун бушиву агьали хIажлийн тIайла буккаврил масъалартту.
— Комитетрал сипталийну, июнь зурул 21-нний, Республикалул ХIукуматрал председательнал хъиривчу Рамазан Жяъпаровлул каялувшиндаралу, Дагъусттаннал таможнялул, ФСБ-лул, «Марва Тур» компаниялул ва цаймигу идарарттал вакилтурайнгу оьвкусса, хIажлил масъаларттан хас дурсса батIаву дурссар. Му совещаниялий сакин дурссар хIажлийн агьали тIайла буккаврин хас дурсса давурттал план. Мукунма июнь зурул 24-нний вайва масъаларттан хас дурсса, Республикалул диндалул комитетрал зузалтращалсса, батIаву хьуссар Дагъусттаннал таможнялул идаралийгу. ЯрахIмад ХанмахIаммадовлул бувсунни комитетрал зузалтрал агьалинахьхьун аьрщарайхсса транспортрай хIажлийн гьансса ихтияр къадуллалишиву бувчIин буллалисса давуртту дачин дурну бушиву цала сайтрайгу. ЦIанакулсса чIумал комитетрал хIадур дуллай буссар хIажлийн наниминнансса тIалавшиннарду дусса памяткарду. Комитетрал «Марва Тур» ООО-лущал цачIуну сакин дурссар хIажлийн наниминнансса ва миннал гъан-маччаминнансса, цIухху-бусу бувансса, уква оьвчин бюхъайсса телефонну дусса центр. ХIажлил хIакъираву цIухху-бусу бан ччиманаща Аьрасатнава оьвчин бюхъайссар ва телефондалий: 8 80007003736; МахIачкъалалиягу ва телефондалий: 56 66 62.
Дагъусттаннал таможнялул контрольданул ва таможнялул процедурардал отделданул хъунама Тагьир БагтIагьировлул «Марва Тур» компаниялул вакилтурая тIалав дунни, чIун-чIумуй сакингу дурну, цачIанна диян даву хIажлийн нанисса инсантурал ва самолетирттал рейсирдал сияхIрал ккал. Мукунма ванал тIалав бунни Диндалул комитетрал ва туроператортурал зузалтрая гьарица хIажлийн нанисса инсаннахьхьун хIажлийн лагаврил низам ва кьяйдарду чивчусса памяткарду дулаву.
Роспотребнадзорданул санитариялул отделданул хъунмур Ирина Алжанбаговал бувсунни гьашину личIисса дахханашивуртту къархьушиву хIажлийн нанисса инсантуран ккаккан дурсса тIалавшиннардаву. ЦIуллу-сагъшиву дуруччаврил министерствалул тIалавшинна дур хIажлийн наниманал медициналул карта электрон журалийн дуцаву маслихIат ккаклакисса.
«Марва Тур» компаниялул вакил Булат Кьурбановлул бувсунни туроператортурал багьрал политикалия ва мукунма гьашинусса путевкардал багьри лагь бувшиву. Мунийн бувну, ларгсса шинах бурувгун, хIажлийн наниминнал сияхIгу лахъ хьуну дур. Июль зурул 21-ннийн кьамул бувну бур хIажлийн наниминнаясса 4000 аьрза.
— Аьрасатнава хIажлийн наниминнан дур яла кьюркьусса путевкарду. Щала билаятраягу хIажлийн яла кьюркьуми путевкарду дур Дагъусттанная. Му тасттикь бан бюхъайссар жула ва чил билаятирттал туроператортурал сайтирдайсса путевкардал багьри цачIу бивхьуну. Гьашину «Марва Тур» компаниялул яла лагьмур багьлунсса хIажлийнсса путевка дур 1800 долларданунсса, — увкунни Булат Кьурбановлул.
Ванал бувсунни гьашину хIажлийн наниминная кьамул буллалисса документирттаву хьусса дахханашивурттая.
Гьашину Саоьдуллал Аьрабнавун хIажлийн нанисса 45 шинавун бияннинсса хъамитайпалия ва 18 шин хьун дурасса оьрчIая визарду тIитIиншиврул, тIалав дуллай бур маччашиву тасттикь буллалисса оригинал свидетельстварду, ташулул ва баврил чагъарду. Му бакъассагу, чил билаятрайн лагайсса паспортирттал чIун духлаглай духьурчан, утти му ца шинал хьхьичI баххана буван аьркинссар, — увкунни Булат Кьурбановлул.
Мукунма Булат Кьурбановлул бувсунни «Скат» тIисса Къазахънал авиалинияртту конкурсрай ххув хьуну, хIажлийнсса агьали ххилансса ихтияр миннахьхьун дуллушиву.
Дагъусттанная хIажлийнсса цалчинсса рейсру дайдихьлахьиссар август зурул 28-нния сентябрь зурул 5-ннийн дияннин. Махъуннайсса рейсругу – сентябрь зурул 18-нния 24-ннийн бияннин.
Ахирданий Жяматийсса советрал комиссиялул хIаж-компаниялул даврин ккавккунни мюнпатсса маслихIатру.
